ކ. ދިއްފުށީ ފަޅުގައި އޮތް ޑިންގީއެއްގައި ރޯ ކުރުމުގެ ސަބަބުން ބޭނުން ނުކުރެވޭ ވަރަށް އަނދައިފިއެވެ. ފުލުހުން ވިދާޅުވީ އެ ޑިންގީގެ ކުރީކޮޅުން ފެށިގެން މެދާ ހަމައަށް ވަނީ އަނދައިފައި ކަމަށެވެ. އެއީ އޭގެ ގާތްގަޑަކަށް 60 އިން ސައްތައެވެ.
ފުލުހުން ވިދާޅުވީ މިޙާދިސާގެ މަޢުލޫމާތު ލިބިފައިވަނީ މިރޭ 1:13 އެހައިކަންހާއިރު ކަމަށެވެ. މި މަޢުލޫމާތު ލިބުމާއެކު ފުލުހުންވަނީ އެސަރަޙައްދަށް ގޮސް އެމްއެންޑީއެފް ފަޔަރުންނަށް ރިޕޯޓު ކޮށްފައެވެ. އެމްއެންޑީއެފްގެ ފަޔަރުވަނީ ރޯވެފައިވާ އަލިފާން ނިއްވާފައެވެ.
ނުވަފޫޓުގެ މި ޑިންގީގައި ރޯކޮށްފައިވަނީ އޭގެ ކުރީކޮޅުގައެވެ. މިހާދިސާގައި ޑިންގީ އައްސާފައިވާ ވާކަނޑައިގެން ގޮސް އޭތިވަނީ ވަރަށް ބޭރަށް އޮޔާ ގޮސްފައެވެ. އެހެންނަމަވެސް ފަހުން އެވަނީ އެރަށަށް ގެނެސްފައެވެ.
މިއީ ރަޖިސްޓްރީ ނުކޮށް ދުއްވާ ޑިންގީއެކެވެ. މިހާދިސާގައި ޑިންގީގެ އިންޖީނުގެ މުއްގަނޑާއި ބޭރުގެ ކަވަރު ވަނީ ކޮންމެވެސް ވަރަކަށް އަނދައިފައެވެ. ފުލުހުން ގެންދަނީ މިމައްސަލަ ބަލަމުނެވެ.
މިޙާދިސާއާ ގުޅިގެން މިހާތަނަށް އެއްވެސް މީހަކު ބަންދުކޮށްފައެއް ނުވެއެވެ.
Adhulu insaaf nethumun vaagoi