އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) ގެ ހުއްދަ ނުލިބިގެން އަމިއްލަ މީހުންގެ ރުއްތައް ވިއްކާ ނުލެވޭ ނުވަތަ އެހެންތަނަކަށް ނުގެންދެވޭ ޝަކުވާއާއި އަލަށް ހިއްކާ ރިސޯޓުތަކަށް ބޭނުންވާ ރުއްތައް ނުލިބުމުގެ ޝަކުވާ ވަރަށްބޮޑު ކަމަށް އީޕީއޭއިން ވިދާޅުވެއްޖެއެވެ.
ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ ކޮންމެހެން ކަނޑާލަންޖެހޭ ރުކެއް ނޫނީ ކަނޑާލުމުގެ ހުއްދައެއް އީޕީއޭއަކުން ނުދެއްވާނެ ކަމަށެވެ. އަދި ކޮންމެހެން ނަގާ ރުއްތަކުގެ ތެރެއިން ދުވަސްވެ މުސްކުޅި ވެފައިވާ ރުއްތައް އެހެންތަނަކަށް ގެންގޮސްގެން އިންދުމުގެ ބަދަލުގައި ރަނގަޅުވާނީ ނުއިންދުން ކަމަށް ވެސް އޭނާ ވިދާޅުވިއެވެ.
ތަރައްގީގެ މަޝްރޫޢޫތަކަށް ވެސް ރުއް ކެނޑުމުގެ ހުއްދަ ދެއްވަނީ ވަރަށްބޮށް ބެއްލެވުމަށްފަހު ކަމަށް އޭނާ ވިދާޅުވިއެވެ. މިހާރު އެންމެބޮޑު ޝަކުވާއަކީ ރަށްރަށުގައިހުރި މީހުންގެ ރުއްތައް ވިއްކާލަން ނުވަތަ އެހެން ތަނަކަށް ގެންދަން ބޭނުންވެގެން އެކަން ނުކުރެވިގެން ކުރާ ޝަކުވާ. ދެން ހިއްކައިގެން ރިސޯޓުތައް ހަދާ މީހުންނަށް ބޮޑެތި ރުއްތައް ނުލިބިގެން ކުރާ ޝަކުވާއޮތީ،" ނަޢީމް ވިދާޅުވިއެވެ.
ނަޢީމް ވިދާޅުވީ ރުއްތައް ކަނޑައި ސާފުކުރުމުގެ ހުއްދަ ދެނީ ކޮންމެހެން ސާފުކުރަންޖެހޭ ތަނެއް ސާފުކުރަން ކަމަށެވެ. "ސާފު ކުރަންޖެހޭނީ ޕްރޮޖެކްޓެއް އައިސްގެން އެޕްރޮޖެކްޓުގައި ލާރި ހުރެގެން މަސައްކަތްކުރާ ހިސާބަށް ދިޔައިމާ ނޫނީ ގޯތި ވެސް ދޫކޮށްފައި ހުންނަ ތަންތަނުން ނޫނީ މަގެއްވެސް ހަދަންޖެހިފައި އޮންނަ ތަންތަނުން. އަދި ރަށް ކިތަންމެ ބޮޑުވިޔަސް އެކަމުގައި ޒަރޫރީ ބޭނުމެއް ނެތިއްޔާ" ނަޢީމް ވިދާޅުވިއެވެ.
