ބަންގްލާދޭޝްއަށް 165 މިލިއަން އެމެރިކާ ޑޮލަރުގެ އެހީއެއް ދިނުމަށް ވާލްޑް ބޭންކުން ނިންމައިފިއެވެ. މިއެހީއަކީ އެ ގައުމުގައި ތިބި ރޮހިންޖާ މުސްލިމް ރެފިއުޖީންގެ ހާލަތު ރަނގަޅުކޮށް އެމީހުންނަށް އެހީތެރިކަން ފޯރުކޮށްދިނުމަށް ހިންގާ މަޝްރޫއަށް ޚަރަދު ކުރުމަށް ދޭ އެހީއެކެވެ.
"މިޔަންމާގައި ހިންގި ހަރުކަށި އަމަލުތަކަށް ފިލަން ބަންގްލާދޭޝްއަށް އައިސް ތިބި ރެފިއުޖީންނަށް އަސާސީ ޚިދުމަތް ދިނުމަށާއި، ކާރިސާތަކުންނާއި، އިޖްތިމާއީ ދަތިތަކުން ރައްކާތެރިކަން ހޯދައިދިނުމަށް މިއެހީގެ ބޭނުން ހިފޭނެ." ވާލްޑް ބޭންކުން ނެރުނު ބަޔާނެއްގައި ވެއެވެ.
މި އެހީގެ އެއްބަސްވުމުގައި ސޮއިކޮށްފައި ވަނީ އިއްޔެ ބަންގްލާދޭޝްގެ ޕްލޭނިންގ ކޮމިޝަންގެ އިކޮނޮމިކް ރިލޭޝަންސް ޑިވިޝަން (އީއާރްޑީ) ގައި ބޭއްވުނު ރަސްމިއްޔާތެއްގައެވެ.
"ބަންގްލާދޭޝް ސަރުކާރާއި ރައްޔިތުން ވަނީ ގާތްގަނޑަކަށް އެއް މިލިއަން ރޮހިންޖާ ރެފިއުޖީންނަށް ދީލަތިކަމާއެކު އެހީތެރިވެދީފައި. އެހެނަސް، މިހާރު އެމީހުންނަށް ވަނީ އަސާސީ ޚިދުމަތްތަކާއި، ނަރުދަމާގެ ނިޒާމާއި، ތައުލީމާއި، ތިމާވެށީގެ ދާއިރާއިން (އިތުރު) އެހީތެރިކަން ބޭނުންވެފައި." ވާލްޑް ބޭންކުގެ ފަރާތުން ބަންގްލާދޭޝްއާއި ބޫޓާނަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ޑަންޑަން ޗެން ވިދާޅުވިއެވެ.
'އިމަޖެންސީ މަލްޓި ސެކްޓާ ރޮހިންޖާ ކްރައިސިސް ރެސްޕޮންސް ޕްރޮޖެކްޓް' ގެ ނަމުގައި ހިންގާ މި މަޝްރޫއުގެ ދަށުން ރޮހިންޖާ ރެފިއުޖީ ކޭންޕްތުގައި 53 ވަގުތީ ހިޔާ އިމާރާތްކޮށް، 200 ކިލޯމީޓަރު މަގު ރަނގަޅު ފެންވަރަށް ހަދައި، 2 ލައްކަ މީހުންނަށް ނަރުދަމާއާއި ސާފު ބޯފެނުގެ ޚިދުމަތްދީ، 1500 މަގު ބައްތި ޖަހާނެއެވެ. މި މަޝްރޫއުގެ ދަށުން ކާރިސާތަކުގައި ހަރަކާތްތެރިވާނެ ގޮތުގެ ތަމްރީނުވެސް ދެވޭނެއެވެ.
އޮންޓާރިއޯ އިންޓަނޭޝަނަލް ޑިވޮލޮޕްމަންޓް އެޖެންސީ (އޯއައިޑީއޭ) އިން ލަފާކޮށްފައިވާ ގޮތުގައި 25 އޮގަސްޓް 2017 އިން ފެށިގެން މިޔަންމާ ސިފައިން ރޮހިންޖާ މުސްލިމުންދާ ދެކޮޅަށް ހިންގި ނަސްލު ނައްތާލުމުގެ އަމަލުތަކުގައި 24 ހާހަށްވުރެ ގިނަ މުސްލިމުން މަރާފައި ވެއެވެ. އަދި 19 ހާސް މުސްލިމް އަންހެނުންގެ އިއްފަތްތެރިކަން ނަގާލައި، 1 ލައްކަ 15 ހާސް ގެ އަންދާލައި، 1 ލައްކަ 13 ހާސް ގެ ލޫޓުވާފައި ވެއެވެ.
މި އަނިޔާވެރިކަމުން ސަލާމަތްވުމަށް 7 ލައްކަ 50 ހާސް މީހުން ސަރަހައްދީ ރޮނގު ހުރަސްކޮށް ބަންގްލާދޭޝްއަށް އެތެރެވެފައިވާ ކަމަށް އެމްނެސްޓީ އިންޓަނޭޝަނަލް ޖަމްއިއްޔާއިން ލަފާކުރެއެވެ. އޭގެތެރޭން ދެބައިކުޅަ އެއްބައި މީހުންނަކީ އަންހެނުންނާއި ކުޑަކުދީންނެވެ.
މިއެހީއަކީ 2018 ވަނަ އަހަރު ޖޫން މަހު ވާލްޑް ބޭންކުން ފިޔަވަހިތަކަކަށް ބަހާލައިގެން ބަންގްލަދޭޝްއަށް ދޭން ނިންމި 500 މިލިއަން އެމެރިކާ ޑޮލަރުގެ ތެރެއިން ދޭ ތިންވަނަ ފިޔަވަހީގެ އެހީއެވެ.
