ބްރެޒިލްގެ ޤާނޫނުހަދާ މަޖިލީހުން އެޤައުމުގެ ރައީސާ ދިލްމާ ރޫސެފް މަޤާމުން ވަކިކުރުމާގުޅިގެން، ނައިބުރައީސް މައިކަލް ޓިމާރ ރައީސްކަމުގެ މަޤާމަށް ޢައްޔަންކޮށްފިއެވެ.
ބުދަދުވަހު ރައީސްކަމުގެ ހުވާ ކުރެއްވުމަށްފަހު ޢުމުރުން 75 އަހަރުގެ ޓިމާރ ވަނީ ރައްޔިތުންނާ މުޚާޠާބުކުރައްވާ ވާހަކަފުޅުދައްކަވާފައެވެ. އޭނާ ވިދާޅުވީ ބްރެޒިލްއަށް މުޅިން އާ ޒަމާނެއް ގެނެސްދެއްވާނެކަމަށެވެ. އެހެންނަމަވެސް އޭނާއަށް ވެރިކަމުގެ މަޤާމުގައި ހުންނެވޭނީ، 2018 ވަނަ އަހަރަށް ތާވަލްކޮށްފައިވާ ބްރެޒިލްގެ ރިޔާސީ އިންތިޚާބާ ހަމައަށެވެ. އެހިސާބަށް މިހާރު ހިނގަމުންމިދާ ވެރިކަމުގެ ދައުރު ނިމޭނެއެވެ. ހުވާކުރެއްވުމަށްފަހު ޓިމާރ ވިދާޅުވީ، މިފެށިގެން ދިޔައީ، ބްރެޒިލްއަށް އާ ޒަމާނެއް ގެންނާނެ ދެއަހަރާއި، ހަތަރުމަސްދުވަހުގެ ފެށުންކަމަށެވެ.
އެގޮތަށް މަސައްކަތްކުރުމަށް ޓިމާރ ވަނީ އޭނާގެ ކެބިނެޓަށް އިލްތިމާސްކުރައްވާފައެވެ.
ބްރެޒިލްގެ ރައީސާ ދިލްމާ ރޫސެފް މަޤާމުން ވަކިކުރީ ދައުލަތުގެ ބަޖެޓަށް މަކަރުހެދި މައްސަލައެއްގައެއެވެ. މަޤާމުން ވަކިކުރުމަށް އެޤައުމުގެ ޤާނޫނުހަދާ މަޖިލީހުން ވޯޓުނެގިއިރު، އޭނާ ހުންނެވީ މަޤާމުން ސަސްޕެންޑުކޮށްފައެވެ.
ދިލްމާ ރޫސެފް ބްރެޒިލްގެ ރައީސާކަމުގެ މަޤާމަށް ވަޑައިގަތީ 2011 ވަނަ އަހަރުގައެވެ. އޭރުވެސް އޭނާއާ ގުޅޭގޮތުން ބްރެޒިލްގެ ގިނަބަޔަކު ދިޔައީ ކޮރަޕްޝަންގެ ތުހުމަތުތައް ކުރަމުންނެވެ.
އެގައުމުގެ ބަޖެޓު އޮޅުވާލި މައްސަލައާއި، މަކަރުހަދައި އޮޅުވާލައި ގާނޫނާ ޚިލާފުވެވަޑައިގަތްކަމުގެ ތުހުމަތު އޭނާގެމައްޗަށްވަނީ ކޮށްފައެވެ.
