ރައްޔިތުންގެ މަޖިލިހުގެ މިއަހަރުގެ ދެވަނަ ދައުރުގެ ޖަލްސާއަކުން ނަން އިއްވަވައި ޖަލްސާއިން ނެރުނު ފުރަތަމަ މެމަބަރުކަމަށް މެދުހެންވޭރު ދާއިރާގެ އެމްޑީޕީގެ މެމްބަރު އަލީ އާޒިމް ވެއްޖެއެވެ.
މަޖިލީހުގެ މިއަދުގެ ޖަލްސާގއިވަނީ އާޒިމްގެ ނަން އިއްވައި މަޖިލީހުގެ މިއަދުގެ ޖަލްސާއިން އޭނާ ނެރެފައެވެ.
މިއީ މަޖިލީހުގެ ދެވަނަ ދައުރު ފެށުނު ފަހުން މަޖިލީހުގެ މެމްބަރެއްގެ ނަން އިއްވި ފުރަތަމަ ފަހަރެވެ. އާޒިމްގެ ނަން މަޖިލިހުގެ ރިޔާސަތުން އިއްވި ނަމަވެސް މިއަދުގެ ޖަލްސާ މެދުކަނޑާލާފައެއް ނުވެ އެވެ. އާޒިމް ވަނީ އޭނާގެ ނަން އިއްވުމުން އަމިއްލައަށް ޖަލްސާ ދޫކުރައްވައި ވަޑައިގެންފަ އެވެ.
މަޖިލިހުގެ މިއަދުގެ ޖަލްސާ ހަލަބިލިވެ ހޫނުވާންމެދުވެރިވީ ފޭދޫ މެމްބަރު އިބްރާހިމް ދީދީ މިއަދުގެ ޖަލްސާގައި ދެއްކެވި ވާހަކަފުޅަކާ ގުޅިގެންނެވެ. އަލީ އާޒިމް ޑީއާރުޕީގައި ހުންނެވިއިރު، އެމްޑީޕީ މެމްބަރުން އޭނާއަށް "ވަގަށް" ގޮވި ކަމަށް ތުހުމަތު ކުރައްވައި މެމްބަރު އިބްރާހީމްދީދީ ވާހަކަފުޅުދެއްކެވުމުންނެވެ. .
އޭރު މަޖިލީހުގައި ބަހުސް ކުރަމުން ދިޔައީ އެއްވެ އުޅުމުގެ ޤާނޫނަށް ހުށަހެޅި އިސްލާހަށެވެ.
އިބްރާހީމްދީދީގެ ވާހަކަފުޅާ ގުޅިގެން އަލީ އާޒިމާއި އެމްޑީޕީގެ އެހެން ބައެއްމެމްބަރުންވަނީ އަޑުގަދަ ކުރައްވައި އިބްރާހިމް ދީދީގެ ވާހަކަތަކަށް ރައްދު ދެއްވަން ފައްޓަވާފައެވެ. މަޖިލީހުގެ ތަޅުމުގައި ޢާއްމުކޮށް ވާހަކަދައްކާ އުސޫލާ ޚިލާފަށް ގިނަ މެމްބަރުންތަކެއް އަޑުގަދަކުރައްވަން ފެއްޓެވުމާއެކު މަޖިލީހުގެ ރިޔާސަތުން ވަނީ ގަވާއިދަށް ހުރުމަތްތެރިކޮށް ހިތުމަށް އަންގަވާފައެވެ. އަދި ތަކުރާރުކޮށް، އިންޒާރުކުރެއްވުމަށްފަހު އަލީ އާޒިމްގެ ނަން ރިޔާސަތުން ވަނީ އިއްވަވާފައެވެ. ރިޔާސަތުގައި އިންނެވީ މަޖިލީހުގެ ނައިބުރައީސް މޫސާމަނިކެވެ.
