މަސްތުވާތަކެއްޗާއި ފައިސާއާއެކު ދެ މީހަކު ވިލިމާލެއިން ފުލުހުންގެ ބެލުމުގެ ދަށަށް ގެނެސްފިއެވެ.
މިމައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 27 އަހަރުގެ ފިރިހެނަކާއި 36 އަހަރުގެ ފިރިހެނެކެވެ. މި ދެމީހުންނަކީވެސް ދިވެހިންނެވެ.
މި ދެމީހުން ފުލުހުންގެ ބެލުމުގެ ދަށަށް ގެނެސްފައިވަނީ ވިލިމާލެ އަށް ދަތުރުކުރި ފެރީއެއްގައި އެވަގުތު ތިބި ފުލުހުންނަށް މި ދެމީހުންގެ އަމަލުތައް ހުރިގޮތުން ތުހުމަތުކުރެވިގެން 2016 އޮގަސްޓް 4 ވަނަ ދުވަހުގެ 15:07 ހާއިރު ފެރީޓާމިނަލްއަށް އެމީހުން ފޭބިތަނުންނެވެ.
މި ދެމީހުން ފުލުހުންގެ ބެލުމުގެ ދަށަށް ގެނެސް މިދެމީހުންގެ ހަށިގަނޑު ބަލައިފާސްކުރަން އުޅުމުން 27 އަހަރުގެ މީހާ އަތުގައި އޮތް އެއްޗެއް އެއްލާލާފައި ފުލުހުންނަށް ފިލަން ދުއްވައިގަތުމުން ފުލުހުން އޭނާ ހުއްޓުވައި ފުލުހުންގެ ބެލުމުގެ ދަށަށް ގެނެސްފައެވެ. އަދި އެ ދެމީހުން ބަލައިފާސްކުރިއިރު 27 އަހަރުގެ މީހާގެ އަތުން 7500 ރުފިޔާއަށްވުރެ ގިނަ ފައިސާ ފެނިފައިވާއިރު 36 އަހަރުގެ މީހާގެ އަތުން 6700 ރުފިޔާއަށްވުރެ ގިނަ ފައިސާ ފެނިފައިވެއެވެ.
މީގެއިތުރުން އެވަގުތު އެމީހުން ތިބި ސަރަޙައްދު ބަލައިފާށްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި 21 ސެލޯފިންކޮޅާއި ރަބަރު ޕެކެޓެއް ފެނިފައިވެއެވެ.
މި މައްސަލާގައި ފުލުހުންގެ ބެލުމުގެ ދަށަށް ގެނެސްފައިވާ ދެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ވަނީ މިނިސްޓްރީ އޮފް ހޯމް އެފެއަރޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުޤީޤު ކުރިއަށް ގެންދިޔުމަށް 15 ދުވަހުގެ މުއްދަތެއް ދީފައެވެ.
މިމައްސަލަ ވިލިމާލެ ޕޮލިސް ސްޓޭޝަނުން ދަނީ ތަޙްޤީގު ކުރަމުންނެވެ.
