މާފުށީ ޖަލުގެ ވޮކޭޝަނަލް، އެގްރިކަލްޗަރ އެންޑް ޕްރިޒަން ލޭބަރ ޑިޕަރޓްމަންޓާއި އިންސްޓިޓިއުޓް ފޯރ ކަރެކްޝަނަލް ސްޓަޑީޒް (އައިކޯސްޓް) ގުޅިގެން މާފުށީ ޖަލުގެ ދަނޑުތަކުގައި މަސައްކަތް ކުރާ ޤައިދީންނަށް ޚާއްޞަ މަސައްކަތު ބައްދަލު ވުމެއް ފަށައިފިއެވެ.
މިމަހުގެ 26 ވަނަ ދުވަހު ފެށި މި ބައްދަލުވުން ކުރިއަށްދާނީ މާރިޗު 16 ވަނަދުވަހާ ހަމައަށެވެ. މަސައްކަތު ބައްދަލުވުން ނުވަތަ ވޯކްޝޮޕް ކުރިއަށް ގެންދާނީ ކޮންމެ ހަފްތާއަކު ހޮނިހިރު ދުވަހުއެވެ.
މީގެ މަޤްޞަދަކީ މާފުށީ ޖަލުގެ ދަނޑުތަކުގައި މަސައްކަތް ކުރާ ޤައިދީންނަށް ގަސްހައްދާނެ ގޮތާއި،ކާނާއާއި، ވެލިގަނޑު ތައްޔާރު ކުރާނެގޮތާއި، ގަސްތަކަށް ޖެހޭބަލިތަކާއި، އަދި އެބައްޔަކާ ގުޅިގެން އެގަހަކަށް ދޭނޭ ފަރުވާ ދަސްކޮށްދިނުމާއި، ގަސްތަކަށް ބޭނުންކުރާ ކާނާއާއި، ބެހޭގޮތުން މަޢުލޫމާތު ދިނުން ކަމަށް ކަރެކްޝަނުން ވިދާޅުވެފައިވެއެވެ. އަދި ގަސްތަކަށް ބޭސްޖެހުމުގައި ޢަމަލުކުރަންޖެހޭ ގޮތްތައް ދަސްކޮށްދިނުމާއި، ސަލާމަތީ ގޮތުން ޤައިދީން އަމަލުކުރަންޖޭހޭ ކަންތައްތައް ވެސް ދަސްކޮށްދޭނެއެވެ.
މިއީ ޤައިދީން މުޖުތަމަޢަށް ނުކުންނައިރު އެމީހުންނަކީ މަސައްކަތްތަކެއް ކުރަން ދަންނަ ބަޔަކަށް ހެދުމާއި، ޖަލުގައި ތިބޭ ދުވަސްވަރު އެމީހުންގެ އުޅުން އިސްލާޙް ކުރުމަށް ފުރުޞަތު ތަނަވަސްކޮށްދިނުން ކަމަށް ވެސް ކަރެކްޝަނުން ވަނީ ވިދާޅުވެފައެވެ.
