ރައްޔިތުންގެ މަޖިލީހުގެ އިންތިހާބަށް ކުރިމަތިލުމުގެ ފުރުސަތު މާދަމާރޭ ހުޅުވާލާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އެ ކޮމިޝަންގެ މެމްބަރު އަދި ތަރުޖަމާނު އަޙުމަދު އަކުރަމް ވިދާޅުވީ އިލެކްޝަން އިޢުލާން ކުރެއްވުން އޮންނާނީ ހޮޓެލް ޖެންގައި މާދަމާރޭ ބާއްވާ ރަސްމިއްޔާތެއްގައި ކަމަށެވެ.
ރައްޔިތުންގެ މަޖިލީހުގެ އިންތިޚާބު ބާއްވާނީ އެޕްރީލް މަހުގެ 6 ވަނަ ދުވަހު ކަމަށެވެ. މިފަހަރުގެ އިތިޚާބުގައި ޖުމްލަ 87 ދާއިރާއަކަށް ކެންޑިޑޭޓުން ވާދަކުރައްވާނެ ކަމަށެވެ. އެއީ މާލެއަށް އިތުރުކުރި ދެ ދާއިރާ ހިމަނައިގެންނެވެ. މީގެ ކުރިން ރާއްޖޭގައި އޮންނަނީ އިންތިޚާބީ 85 ދާއިރާއެވެ.
އިންތިޚާބު އިޢުލާން ކުރުން މާދަމާރޭ ބާއްވާއިރު ބައެއް ޕާޓީތަކުން ވަނީ ދާއިރާތަކަށް ކުރިމަތިލާ ކެންޑިޑޭޓުންގެ މެދުގައި ޕްރައިމަރީ ބާއްވައި ކެންޑިޑޭޓުން ފައިނަލް ކޮށްފައެވެ.
މި އިންތިޚާބުގައި ކުރީގެ ބައެއް ރައީސުންނާއި ނާއިބު ރައީސުންނާއި ކުރީގެ ބައެއް ވަޒީރުން ވާދަކުރައްވައެވެ. އެހެން ކަމުން މިއިތިޚާބު ވަރަށް ވާދަވެރިވާނެ ކަމަށް ބެލެވެއެވެ.
