ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ލަފާދޭ ޤައުމީ ކޮމެޓީ އިލެކްޝަންސް ކޮމިޝަނުން އެކުލަވާލައިފިއެވެ. މި ކޮމިޓީގައި ޑީއާރުޕީ ފިޔަވައި އެހެން ޕާޓީތަކުގެ މެމްބަރުން ހިމަނާފައިވެއެވެ.
އިލެކްޝަންސް ކޮމިޝަނުގެ މެމްބަރު އަދި ތަރުޖަމާނު އަޙުމަދު އަކުރަމް ވިދާޅުވީ ޑީއާރުޕީ ނުހިމަނައި މިވަގުތު ކޮމިޓީ އެކުލަވާލައިފައިވަނީ އެޕާޓީން ބޭފުޅެއްގެ ނަން ފޮނުވައިފައި ނުވާތީ ކަމަށެވެ. އެހެންނަމަވެސް ނަން ފޮނުވިހާ އަވަހަކަށް ހިމަނާނެ ކަމަށެވެ.
"ނަން ފޮނުވަން އަޅުގަނޑުމެން އޮންނާނީ ތާރީޚެއް ދީފައި. އެތާރީޚުގައި ނުފޮނުވުނަސް އަޅުގަނޑުމެން ފްލެކްސިބިލީޓީއެއް އެބަދެން،" އަކުރަމް ވިދާޅުވިއެވެ. ޤައުމީ ލަފާދޭ ކޮމިޓީ އެކުލަވާލުމަށްފަހު ބާއްވާ ބައްދަލުވުންތައް ވެސް ވަރަށް އަވަހަށް ފަށާގޮތަށް އިލެކްޝަންސް ކޮމިޝަނުން ވަނީ ހަމަޖައްސަވައިފައެވެ.
މި ކޮމިޓީއަކީ ކޮންމެ އިންތިޚާބަކާ ދިމާކޮށް ޤާނޫނީ ގޮތުން އުފައްދަންޖެހޭ ކޮމިޓީއެވެ.
