އެމްއެންޑީއެފް މާލޭ އޭރިއާ އާއި، ކޯސްޓްގާޑުގެ ފަރާތުން، ކ.މާފުށީ ރަށު ކައުންސިލްގެ މެންބަރުންނާ މިއަދު ބައްދަލުކުރައްވައިފިއެވެ.
މި ބައްދަލުވުން ބާއްވައިފައިވަނީ މާފުށީ ކައުންސިލް އިދާރާގައި މިއަދު މެންދުރުފަހުގައެވެ. މިއީ ރައްޔިތުންގެ ސަލާމަތާއި ރައްކާތެރިކަމަށް އެމްއެންޑީއެފުން ކުރަމުންދާ މަސައްކަތުގައި، ކަނޑުމަތީގައި ހިނގާ ނުރައްކާތެރި ހާދިސާތަކުން ރައްކާތެރިވުމުގެ ގޮތުން ލޯކަލް ޓުއަރިޒަމްގެ ދާއިރާގައި މަސައްކަތްކުރާ ބޭކަލުންނާއި ރަށުގެ ޒުވާނުން ހޭލުންތެރިކުރުމަށް ޕްރޮގްރާމްތައް ހިނގުމާ ބެހޭ ގޮތުން ދެ ފަރާތުން މަޝްވަރާކުރުމަށް ބޭއްވެވި ބައްދަލުވުމެއް ކަމަށް އެމްއެންޑީއެފުން ވިދާޅުވިއެވެ.
މި ބައްދަލުވުމުގައި، އެމްއެންޑީއެފްގެ ފަރާތުން ބައިވެރިވެވަޑައިގެންނެވީ ކޯސްޓްގާޑުގެ ކޮމާންޑަރ، ބްރިގޭޑިއަރ ޖެނެރަލް ޢަލީ ޒުހައިރާއި އެމްއެންޑީއެފް މާލޭ އޭރިއާގެ ކޮމާންޑަރ ކާނަލް ޢަބްދުއްރަޢޫފެވެ. އަދި ކ.މާފުށީ ކައުންސިލްގެ ރައީސް އުޘްމާން ރަޝީދާއި، ނާއިބު ރައީސް ނަޝީދާ އާދަމް އަދި އެ ކައުންސިލް އިދާރާގެ އިސް ބޭފުޅުން މި ބައްދަލުވުމުގައި ބައިވެރިވެވަޑައިގެންނެވިއެވެ.
