ދިވެހިރާއްޖޭގެ އިދާރީ ދާއިރާތައް ލާމުރަކަޒީ އުޞޫލުން ހިންގުމުގެ ޤާނޫނު އިޞްލާޙު ކުރުމަށްޓަކައި އާއްމުންގެ ޚިޔާލު ހޯދުމަށް ހުޅުވާލައިފިއެވެ. މި ޤާނޫނަކީ ރާއްޖޭގެ އިދާރީ ދާއިރާތައް ހަރުދަނާކޮށް ހިންގުމަށްޓަކައި ކައުންސިލްތަކަށް ބަރުލިބިދޭ ޤާނޫނެކެވެ.
އެހެންކަމުން އިދާރި ދާއިރާތައް ހަރުދަނާކޮށް ހިންގުމަށްޓަކައި ޤާނޫނަށް ގެންނަންޖެހޭ ބަދަލުތައް ގެނެސް، ޤާނޫނު އިޞްލާޙު ކުރުމަކީ މި ސަރުކާރުގެ ފުރަތަމަ ސަތޭކަ ދުވަހުގެ ތެރޭގައި ފުރިހަމަ ކުރުމަށް ވެފައިވާ ވަޢުދެކެވެ.
ބަންޑާރަނައިބުގެ އޮފީހުން މިއަދު ނެރުއްވި ނނޫސް ބަޔާނެއްގައި ހާމަކުރައްވަފައިވާ އާއްމުންގެ ޚިޔަލު ހޯދުމަށް ހުޅުވައިލީ ކަމާ ބެހޭ ފަރާތްތަކާ ކުރެވޭ މަޝްވަރާގެ އިތުރުން އާއްމުންގެ ޚިޔާލު ހޯދުމަކީ ވެސް މުހިއްމު ކަމެއް ކަމުގައި ފެނިވަޑައިގަންނަވާތިއެވެ.
އާއްމުންގެ ޚިޔާލު ހޯދުމަށް ފުރުޞަތު ހުޅުވާފައިވަނީ ގޫގުލް ފޯމް މެދުވެރިކޮށެވެ. ޚިޔާލު ހުށަހަޅަން ބޭނުންވާ ފަރާތްތަކަށް މިއަދުން ފެށިގެން އަންނަ ފެބްރުއަރީ މަހުގެ 3ވަނަ ދުވަހާ ހަމައަށް ޚިޔާލު ހުށަހެޅޭނެ ކަމަށް އޭޖީ އޮފީހުން ހާމަކުރައްވައެވެ. އޮންލައިންކޮށް ޚިޔާލު ހުށަހަޅަން ބޭނުްނވާ ފަރާތްތަކަށް ތިރީގައިވާ ލިންކަށް ފިތާލުމުން ގޫގުލް ފޯމު ފެންނާނެއެވެ.
https://docs.google.com/forms/d/e/1FAIpQLSesyRntkImLrn69WboMEVselYjbKTNmyt-l4AW-aKMt_R-b8g/viewform
ގޫގުލް ފޯމުެގ އިތުރުން އީމޭލް މެދުވެރިކޮށް ޚިޔާލު ހުށަހަޅަން ބޭނުންވާ ފަރާތްތަކަށް legislative.affairs@agofice.give.mv އަށް އީމޭލް ކުރުމުގެ ފުރުޞަތު އޮންނާނެ ކަމަށްވެސް އޭޖީ އޮފީހުން ހާމަކުރައްވައެވެ.
އޭޖީ އޮފީހުގެ ނޫސް ބަޔާނުގައި ހާމަކުރައްވާފައިވާ ގޮތުގައި މި ޤާނޫނު އިޞްލާޙު ކުރުމަށްޓަކައި މިހާތަނަށް ކަމާ ބެހޭ ގިނަ ފަރާތްތަކަކާ އެކު މަޝްވަރާ ކުރެވިައިވެއެވެ. އޭގެ ތެރޭގައި ސަރުކާރުގެ ވުޒާރާތަކާއި މިނިވަން މުއައްސަސާ ތަކާއި، މަދަނީ ޖަމްޢިއްޔާ ތަކާއި، ދާއިރާގެ ތަޖުރިބާކާރުން ހިމެނެއެވެ. އަދި ސިތީ ކައުންސިލްތަކާއި އަތޮޅު ކައުންސިލްތަަކަށް ވެސް ޚިޔާލު ހުށަހެޅުމުގެ ފުރުޞަތު ވަނީ ހުޅުވާލާފައެވެ.
