އެމްޑީޕީގެ ކުރީގެ ރައީސް އިބްރާހީމް އިސްމާޢީލް (އިބްރާ) މިރޭ ފުލުސް އޮފީހަށް ހާޒިރު ކޮށްފިއެވެ.
ފުލުހުން ވިދާޅުވީ އިބްރާ ފުލުހަށް ހާޒިރު ކޮށްފައިވަނީ މިރޭ 8:30 ގައި ކަމަށެވެ. އޭނާ ހާޒިރުކުރީ ސޯޝަލް މީޑިއާގައި މީހުންގެ މެދުގައި ރުޅިވެރިކަމާއި، އިންޒާރު ދިނުމުގެ މައްސަލައެއް ފުލުހުން ބަލަމުންދާތީ އެކަމާ ގުޅިގެން ކަމަށެވެ.
ސޯޝަލް މީޑިއާގައި އިބްރާ ދައްކަވައިފައިވާ ބައެއް ވާހަކަތަކާ މެދު ހިތްހަމަނުޖެހިގެން ރާއްޖޭގެ ދީނީ ޢިލްމުވެރިންނާއި ޢާއްމުންގެ ބަޔަކުވަނީ ހިތްހަމަ ނުޖެހުން ފާޅުކޮށްފައެވެ. އަދި އެފަދަ ވާހަކަތައް ހުއްޓުވުމަށް ބައެއް ފަރާތްތަކުން ވަނީ ސަރުކާރަށް ގޮވައިލައިފައެވެ. އަދި ބައެއް މީހުން ވަނީ އެކަން ރައީސުލްޖުމްހޫރިއްޔާގެ ސަމާލު ކަމަށް ވެސް ގެނެސްފައެވެ.
އިބްރާ ދައްކަވައިފައިވަނީ އިސްލާމްދީނާ ޚިލާފު ވާހަކަތަކެއް ކަމަށް ދަންނަ ބޭކަލުން ވަނީ ވިދާޅުވެފައެވެ.
