މިއަންނަ ހަފްތާއިން ފެށިގެން އީމޭލް މެދުވެރިކޮށް ޕާސްޕޯޓުގެ ޚިދުމަތަށް އެދޭ ގޮތް ހަމަޖައްސަވައިފިއެވެ. މިކަން ހާމަކުރެއްވީ އިމިގްރޭޝަންގެ ފަރާތުން ބޭއްވި ނޫސްވެރީންގެ ބައްދަލުވުމެއްގައި ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދް އަޙްމަދް ޙުސައިން އެވެ. މިއަހަރު ނިމުމުގެ ކުރީން އޮންލައިންކޮށް ޕާސްޕޯޓުގެ ޚިދުމަތްތަކަށް އެދޭތަށް އޮންލައިން ޕޯޓަލް އެއް ތަޢާރަފްކުރައްވާނެ ކަމަށް ކޮންޓްރޯލް ޖެނެރަލް ވިދާޅުވިއެވެ. އޭގެ އިތުރަށް ކުރިއަށްއޮތް ދެ އަހަރު ތެރޭ އަތޮޅު ކައުންސިލް ތަކަށް ޕާސްޕޯޓުގެ ޚިދްމަތް ފުޅާކުރެވޭނެ ކަމަށްވެސް ވިދާޅުވިއެވެ.
ކޮންޓްރޯލަރ ޖެނެރަލް ވިދާޅުވިގޮތުގައި މިހާރު ބިޒްނަސް ވިސާ ވެސް 48 ގަޑިއިރު ތެރޭ އެޕްރޫވް ކުރެވޭނެއެވެ. މި ޚިދްމަތް މި ޖަނަވަރީ މަހުގެ 13ވަނަ ދުވަހުން ފެށިގެން ދެމުންދާކަމަށް ވެސް ވިދާޅުވިއެވެ. އަދި ފެބްރުއަރީ މަހުގެ 1ވަނަ ދުވަހުން ފެށިގެން އައްޑޫ ސިޓީ އިންވެސް މި ޚިދްމަތް ލިބޭނޭ ކަމަށް ވިދާޅުވިއެވެ. ޚިދްމަތް އަވަހަށް ފޯރުކޮށް ދިނުމަށްޓަކައި ފެބްރުއަރީ މަހުގެ ފުރަތަމަ ހަފްތާ ތެރޭގައި ޕާޓްނަރ އެޖެންސީ ތަކަށް ޕާސްޕޯޓު ސިސްޓަމަށް މައުލޫމާތު އެޅޭނެ ކަމަށްވެސް ވިދާޅުވިއެވެ.
އަދި އާއްމުންގެ ކަންބޮޑުވުންތަކަށް ވީހާވެސް އަވަހަށް އިޖާބަ ދިނުމުގެ ގޮތުން އީމޭލް މެދުވެރިކޮށް ޝަކުވާ ހުށަހެޅޭނެ ނިޒާމެއްގެ މަސައްކަތް މިހާރު ހަމަޖައްސަވާފައިވާ ކަމަށް ވެސް ކޮންޓްރޯލަރ ޖެނެރަލ ވިދާޅުވިއެވެ. އެހެންކަމުން complain@immigration.gov.mv މެދުވެރިކޮށް މިހާރު ޝަކުވާ ހުށަހެޅޭނެއެވެ.
