ދަރިވަރުންގެ ޙައްޤުތައް ކަށަވަރުކޮށްދީ އެއާއެކުގައިވާ ޒިންމާތައް ދަރިވަރުންނަށް ދަސްކޮށްދެވޭނެ މަޙައުލެއް ޤާއިމް ކޮށްދެއްވުމަށް މުދައްރިސުންގެ އަރިހުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެދިވަޑައިގެންފިއެވެ.
އެމަނިކުފާނު މިކަމަށް އެދިވަޑައިހެންނެވީ ހުރަވީ ސްކޫލް އިފްތިތާޙުކޮށްދެއްވުމުގެ ގޮތުން މިއަދު ހެނދުނު އެ ސްކޫލުގައި ބޭއްވެވި ރަސްމިއްޔާތުގައި ވާހަކަފުޅުދައްކަވަމުންނެވެ.
"އަޅުގަނޑު މިއަދު ރާއްޖޭގެ ހުރިހާ މުދައްރިސުންގެ އަރިހުން ވެސް އެދޭ ވަރަށް ބޮޑު އެދުމެއް އެބައޮތް. އެއީ ދަރިވަރުންގެ ޙައްޤުތައް ކަށަވަރު ކޮށްދިނުމާ އެކު، އެ ޙައްޤުތަކާ އެކުގައިވާ ޒިންމާތައް އެކުދީންނަށް ދަސްކޮށްދެވޭނެ މާޙައުލެއް ޤާއިމުކޮށްދެއްވުން." ރައީސުލްޖުމްހޫރިއްޔާ ވިދާޅުވިއެވެ.
މި ރަސްމިއްޔާތުގައި ރައީސް ވިދާޅުވީ އުނގެނުމަކީ ވަކި ޢުމުރެއްގެ ވަކި ޖިންސެއްގެ، ވަކި މިންތިއެއްގެ މެދުގައި ހިނގާ ކަމެއް ނޫންކަމަށެވެ. އެއީ އެންމެން އެކުގައި ކުރާ ކަމަކަށް ހެއްދެވުމަށް ވެސް ރައީސް ގޮވައިލެއްވިއެވެ.
ރައީސުލްޖުމްހޫރިއްޔާ ވިދާޅުވިގޮތުގައި، ޢިލްމާއި ހުނަރާއި އުނގެނުން އެންމެ ފުންމިނުގައި ކަށަވަރު ކުރެވޭނީ، މުޖުތަމަޢުގެ އެންމެންގެ ބައިވެރިވުމާ އެކުގައިކަމަށެވެ. އެހެންކަމުން ކިޔަވައިދިނުމާއި އުނގެނުމުގެ މާޙައުލު މިގޮތަށް ބައްޓަންކުރުމުން، ހަމްދަރުދީވާން އެނގޭ، އެކަކު އަނެކަކަށް އިޙްތިރާމް ކުރަން އެނގޭ ޖީލެއް ބިނާކޮށްދެވޭނެ ކަމުގައި އެމަނިކުފާނު ވިދާޅުވިއެވެ.
