ހުސްވި އަހަރުގެ ނޮވެމްބަރުމަހު 17 ވަނަދުވަހާ ހަމައަށް ރާއްޖޭގެ ޤާނޫނު ތަންފީޒު ކުރުމުގެ އެންމެ އިސް މީހަކަށް ހުންނަވައިގެން އެމަނިކުފާނު ޤާނޫނާ ޚިލާފުކަމެއް ކުރައްވައިފާނެ ކަމަށް ޤާބޫލު ކުރުމަކީވެސް ގޯހެއް ކަމަށް ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ)ގެ ބޮޑު ޚިޔާނާތުގެ ފައިސާ އިން އެމަނިކުފާނުގެ އަމިއްލަފުޅު އެކައުންޓަށް ޖަމާކޮށްފައި ހުރި ފައިސާ ލޯންޑަކުރުމާއި އެކަމާ ގުޅޭ ގޮތުން ހިންގި ތަހުގީގަށް ދޮގު މައުލޫމާތު ދިން ކަމަށް ތުހުމަތުކުރެވޭ މައްސަލައެއްގައި އެމަނިކުފާނު ފުލުހުންގެ އިދާރާއަށް މިއަދު ހާޒިރު ކުރުމަށްފަހު އެތަނުން ނުކުމެ ވަޑައިގެން ނޫސްވެރީންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
ރައީ ޔާމީން ވިދާޅުވީ އެމަނިކުފާނަށް މިއަދު ތުހުމަތުކުރީ އޭސީސީގެ ބެލުމުގެ ދަށުން އުފެއްދި އެކައުންޓަށް އެއް މިލިއަން ޑޮލަރު ޖަމާކުރީ އޭސީސީއާ އެކު އެއްބަސްވި ގޮތަށް ނޫން ކަމަށް ބުނެ ކަމަށެވެ. އެހެންނަމަވެސް އެމަނިކުފާނު ވަނީ އެކަން ދޮގުކުރައްވައިފައެވެ. އެފަދަ އެކައުންޓެއް ހަދައި އެފައިސާ ޖަމާކުރީ އޭސީސީއާއި އެމަނިކުފާނާ ދެމެދުވެފައިވާ އެއްބަސްވުމެއްގެ ދަށުން ކަމަށް ވެސް ވިދާޅުވިއެވެ. އޭސީސީގެ ކަންބޮޑުވުމެއް އެކަމުގައިވާނަމަ ފުލުހަށް ހުށަހެޅުމުގެ ބަދަލުގައި އެމަނިކުފާނާ ވާހަކަ ދެއްކެވިނަމަ އެކަމެއް ސާފުކޮށްދެއްވީސް ކަމަށް ވިދާޅުވިއެވެ.
ރައީސް ޔާމީން ވިދާޅުވީ އެމަނިކުފާނު ވަކި އެކައުންޓަކަށް އެފައިސާ ޖަމާކުރެއްވީ އެއީ ޤާނޫނާ ޚިލާފަށް ޖަމާވެފައިވާ ފައިސާއެއް ކަމަށް ސާބިތުވެފައިވާތީ ނޫން ކަމަށެވެ.
ރައީސް ޔާމީން ވިދާޅުވީ އޭސީސީއާ އެކު ހެދި އެކައުންޓަށް އެމަނިކުފާނު ޖަމާކޮށްފައިވަނީ އިސްލާމިކް ބޭންކަށް ޖަމާކުރި އެއް މިލިއަން ޑޮލަރު ނޫން ކަމަށް ބުނެ މިއަދު ސުވާލު ކުރެއްވި ކަމަށެވެ. އެހެންނަމަވެސް އެއީ އެއްވެސް ބުރަދަނެއް ހުރި ވާހަކައެއް ނޫންކަމަށް ވެސް ވިދާޅުވިއެވެ.
މީގެ ކުރިންވެސް އެމަނިކުފާނު ވަނީ ފުލުހަށް ހާޒިރު ކޮށްފައެއެވެ. އެފަހަރުވެސް އެމަނިކުފާނު ވިދާޅުވެފައިވަނީ އެކައުންޓުގައިހުރި ފައިސާއަކީ އެމަނިކުފާނުގެ ފައިސާ ކަމަށާއި އެއީ ޖާއިޒު ފައިސާ ކަމަށެވެ. އެއާ މެދު ސުވާލުކުރާ ހީސާބަށް ތަޙުޤީޤުގައި ދިޔުމުން އެކަމަށް ޖަވާބުދެއްވާނެ ކަމަށް ވެސް ވިދާޅުވިއެވެ.
ޔާމީން ވިދާޅުވީ އެސްއޯއެފްގެ އެކައުންޓުގައި ހުރި ހުރިޙާ ފައިސާ އަކީ އެމްއެމްޕީއާރްސީގެ ފައިސާ ކަމެއް އޭސީސީގެ ތަޙުޤީޤަށް އަދި ސާބިތު ވެފައި ނުވާކަމަށެވެ. އެހެންކަމުން އެސްއޯއެފުން ދިން ޗެކަކީ އެމްއެމްޕީއާރްސީގެ ފައިސާ ކަމަށްވުމަކީ ވެސް ވެދާނެ ކަމަށެވެ. އެހެންނަމަވެސް އެކަން އަދިވެސް ސާބިތުވެފައި ނުވާކަމަށް ވިދާޅުވިއެވެ.
އެމަނިކުފާނު ވިދާޅުވީ މޯލްޑިވްސް އިސްލާމިކް ބޭންކުގައި އޮންނަ އެމަނިކުފާނުގެ އެކައުންޓަށް އެސްއޯއެފުން ޖަމާކުރި ފައިސާ އޭސީސީއާ ޙަވާލުކުރާކަށް ވެސް ނުޖެހޭކަމަށެވެ. ސަބަބެއް ކަމަށް ވިދާޅުވީ އެއީ އެމްއެމްޕީއާރްސީގެ ފައިސާކަން ސާބިތު ނުވާތީ ކަމަށެވެ. އެހެންނަމަވެސް އޭސީސީން އެދުމުން މުޢައްސަސާއާއެކު ހެދި އެކައުންޓަކަށް މިހާރުވާނީ އެއް މިލިއަން ޑޮލަރު ޖަމާކޮށްފައި ކަމަށް ވިދާޅުވިއެވެ. އެހެންނަމަވެސް އެ އެކައުންޓަށް ޖަމާކުރީ އެއް މިލިއަން ޑޮލަރުކަމަށާއި އެއީ އެމްއައިބީގައި ހުރި ފައިސާ ނޫން ކަމަށް ވެސް ވިދާޅުވިއެވެ.
