މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް އޮންލައިންކޮށް ވިސާ ފީ ދެއްކޭނެ ޚިދުމަތް މިއަދު ފަށައިފިއެވެ.
މޯލްޑިވްސް ޓެކްސް އެކެމެޑީގައި މިއަދު ބޭއްވި ރަސްމިއްޔާތެއްގައި މިޚިދުމަތް ފަށްޓަވައި ދެއްވީ ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓަރ މުޙައްމަދު މަލީހު ޖަމާލެވެ.
މި ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދު ވިދާޅުވީ މިއަދު މި ޚިދުމަތް ފެށިޔަސް މީރާއިން ދޭ ހުރިހާ ޚިދުމަތެއް އޮންލައިންކޮށް ދިނުމަކީ ކުރިއަށްއޮތް ތަނުގައި ކުރައްވަން ބޭނުންވާ ކަމެއް ކަމަށެވެ. އޭނާ ވިދާޅުވީ މީރާގެ ޚިދުމަތްތައް ވީހާވެސް ފަސޭހަކޮށް ރައްޔިތުންނަށް ދިނުމަށް އަބަދުވެސް މަސައްކަތް ކުރައްވާ ކަމަށެވެ.
އޮންލައިންކޮށް ވޯކް ވިސާ ފީ ދެއްކޭނެގޮތް ވުމުން މީރާގެ ކަލެކްޝަން ސެންޓަރު ތަކަށް ދާކަށް ނުޖެހޭނެއެވެ. އޭގެ ބަދަލުގައި މިއަދު އިފްތިތާޙު ކުރެވުނު އޮންލައިން ސިސްޓަމް މެދުވެރިކޮށް ފައިސާ ދެއްކޭނެ ކަމަށް އޭނާ ވިދާޅުވިއެވެ.
މީރާ އިން ވޯކް ވިސާ ފީ ބަލައިގަންނަން ފެށީ 2011 ވަނަ އަހަރު އެވެ. އޭގެ ކުރިން ލޭބަރ މިނިސްޓްރީންނާއި އިމިގްރޭޝަނުންނެވެ.
