ނިމިދިޔަ ސަރުކާރުން ސިޔާސީ ސަބަބަކަށްޓަކައި ވަޒީފާއިން ވަކިކޮށްފައިވާ ނުވަތަ ނުޙައްޤުން ފިޔަވަޅު އަޅައިފައިވާ މުވައްޒަފުންގެ ޝަކުވާތައް ހުށަހެޅުމަށް ކުރިން ހުޅުވައިލި މުއްދަތު ރައީސް އިބްރާހީމް މުޙައްމަދު ޞާލިޙު އިތުރު ކޮށްދެއްވައިފިއެވެ.
މި މުއްދަތު ކުރިން އޮތީ 2018 ވަނަ އަހަރުގެ ޑިސެމްބަރު 3 އިން ފެށިގެން 30 ދުވަހުގެ މުއްދަތަށެވެ. އިތުރު ކޮށްދެއްވި މުއްދަތު ހަމަވާނީ މިހިނގާ ޖަނަވަރީ މަހުގެ 21 ވަނަ ދުވަހުގެ 14:00 ގެ ނިޔަލަށް ކަމަށް ރައީސް އޮފީހުން ވިދާޅުވެފައިވެއެވެ.
ޝަކުވާ ހުށަހެޅުމުގެ މުއްދަތު އިތުރުކުރައްވާފައިވަނީ މި މުއްދަތު އިތުރު ކޮށްދިނުމަށް ގިނަ ފަރާތްތަކަކުން އެދިވަޑައިގަންނަވަމުން ގެންދަވާތީކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.
ޝަކުވާ ހުށަހަޅާ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުންނާއި، ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެވެން ހުންނާނެއެވެ.
