ހަމަ އެކަނި އެއް ބަޔަކު އެއްބަސްވުންތަކާ އެއްގޮތަށް އަމަލުކުރަން އެމެރިކާއިން އުތުރު ކޮރެޔާއަށް މަޖުބޫރުކުރާނަމަ، 'އާ މަގެއް' އިޚްތިޔާރުކުރަން ޖެހިދާނެ ކަމުގައި އުތުރު ކޮރެޔާގެ ޒައީމު ކިން ޖޮންގ އުން ވިދާޅުވެއްޖެއެވެ.
މީލާދީ އާ އަހަރުގެ މުނާސަބަތުގައި ދެއްވި 30 މިނެޓުގެ ޚިޠާބެއްގައި ކިމް ވިދާޅުވީ ނިއުކުލިޔާ ހަތިޔާރު ނައްތާލުމަށް އަޒުމުކަނޑައަޅުއްވާފައިވާ ކަމަށާއި، އުތުރު ކޮރެޔާއިން އެކަން ކުރިއަށް ގެންދާނެ ކަމަށެވެ. އޭނާ އިތުރަށް ވިދާޅުވީ އެމެރިކާއިންވެސް އުތުރު ކޮރެޔާ ކުރާ މަސައްކަތާއި އެއް ވަރަށް މަސައްކަތްކުރާނަމަ، ދެ ގައުމުގެ ގުޅުން 'ހަލުވި ދުވެލީގައި' ކުރިއަށް ދާނެ ކަމަށެވެ. އަދި ރައީސު ޑޮނަލްޑް ޓްރަމްޕާ ބައްދަލުކުރައްވަން ތައްޔާރަށް ހުންނެވި ކަމަށްވެސް ކިމް ވިދާޅުވިއެވެ.
"ބައިނަލް އަގްވާމީ މުޖްތަމައުން ބަލައިގަންނަ ނަތީޖާއަކާ ހަމައަށް ދާން އަހަރެންނަށް ކުރެވުނު މަސައްކަތެއް ކުރާނަން." ކިމްގެ ޚިޠާބުގައި ވިދާޅުވެފައި ވެއެވެ.
"އެމެރިކާއިން ދުނިޔޭގެ ކުރިމަތީގައި ވީ ވައުދަށް ހުރުމަތްތެރިކޮށް ނުހިތައި، އަހަރުމެންގެ ރައްޔިތުންގެ ކެތްތެރިކަމާމެދު ގޯސްކޮށް ވިސްނައި، އަހަރުމެންގެ މައްޗަށް ކަންކަން މަޖުބޫރުކޮށް، އިގްތިސާދީގޮތުން ދަތިކުރުމުގެ ފިޔަވަޅު އަޅާނަމަ، އަހަރުމެންގެ މިނިވަންކަން ރައްކާތެރިކުރުމަށްޓަކައި އާ މަގެއް އިޚްތިޔާރު ކުރަން ޖެހިދާނެ." ޓީވީ މެދުވެރިކުރައްވައި ދެއްވި ޚިޠާބުގައި ޒައީމު ކިމް ވިދާޅުވިއެވެ.
ކިމްގެ ޚިޠާބުގައި މި އިންޒާރުދެއްވި އިރު، އޭނާގެ ޚިޠާބު މައިގަނޑު ގޮތެއްގައި އަމާޒުކުރައްވާފައި ވަނީ އުތުރު ކޮރެޔާގެ ރައްޔިތުންނަށެވެ. އަދި މައިގަނޑު ގޮތެއްގައި އަލިއަޅުއްވާލައްވާފައި ވަނީ އިގްތިސާދީ މައްސަލަތަކަށެވެ.
ފާއިތުވި 2018 ވަނަ އަހަރަކީ އުތުރު ކޮރެޔާއިން ބައިނަލް އަގްވާމީ ޑިޕްލޮމެސީގެ މައިދާނުގައި ބޮޑެތި ކުރިއެރުންތަކެއް ހޯދި އަހަރެއްކަން ފާހަގަކޮށްލަން ޖެހެއެވެ. އެ އަހަރުގެ އެޕްރީލް މަހުގެ ތެރޭގައި ޒައީމު ކިމް ޖޮންގ އުން ވަނީ ދެކުނު ކޮރެޔާގެ ރައީސު މޫން ޖައެ-އިންއާ ދެގައުމުގެ ސަރަހައްދީ ރޮނގުގައި ބައްދަލުކުރައްވާފައެވެ. އަދި އޭގެ ފަހުން ދެ ފަހަރު ދެ ބޭފުޅުން ބައްދަކުރައްވާފައި ވެއެވެ.
މީގެ އިތުރުން ފާއިތުވި އަހަރުގެ ޖޫން މަހު ސިންގަޕޫރުގައި ޒައީމު ކިމްއާއި އެމެރިކާގެ ރައީސު ޑޮނަލްޑް ޓްރަމްޕްއާއި ދެބޭފުޅުން ބޭއްވެވި ބައްދަލުކުރެއްވުމަކީ އުތުރު ކޮރެޔާއިން ޑިޕްލޮމެސީގެ މައިދާނުގައި ހޯދި އެންމެ ބޮޑު ކާމިޔާބީއެވެ.
