ރާއްޖޭގެ ތަރައްޤީއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ކުރައްވާ ތަޞައްވަރު ޙަޤީޤަތަކަށް ހެދުމަށް ދިވެހި ސަރުކާރުން ކުރާ މަސައްކަތަށް ޖަޕާނު ސަރުކާރުން އެހީވެދެއްވާނެ ކަމުގެ ޔަޤީންކަން އެ ޤައުމުން ވިދާޅުވެއްޖެއެވެ.
އެ ޤައުމުން މިކަން ހާމަކުރައްވައިފައިވަނީ ޑެޕިއުޓީ ޕްރައިމް މިނިސްޓަރ އަދި މިނިސްޓަރ އޮފް ފިނޭންސް، ތާރޯ އާސޯ އެވެ. އެމަނުކުފާނު މިހެން ވިދާޅުވީ ރާއްޖޭގެ ޚާރިޖީ ވަޒީރު، ޢަބްދުﷲ ޝާހިދު، ޖަޕާނަށް ކުރައްވަމުން ގެންދަވާ ދަތުރުފުޅުގައި އެމަނިކުފާނާއެކު ބޭއްވެވި ބައްދަލުވުމުގައި ދެއްކެވި ވާހަކަފުޅުގައެވެ.
މި ބައްދަލުކުރެއްވުން އޮތީ ޖަޕާނުގެ މިނިސްޓްރީ އޮފް ފިނޭންސްގައެވެ. މި ބައްދަލުކުރެއްވުމުގައި މިނިސްޓަރ ޝާހިދު ވަނީ ޖަޕާނުގެ ސަރުކާރުން ރާއްޖެއާމެދު ބަހައްޓަވާ ގާތް ގުޅުމާބެހޭ ގޮތުން ވާހަކަ ދައްކަވައިފައެވެ. އަދި އެކަމަށްޓަކައި ޖަޕާން ސަރުކާރަށް އެމަނިކުފާނު ވަނީ ޝުކުރުއަދާކުރައްވާފައެވެ.
މިނިސްޓަރ ޝާހިދުގެ މި ބައްދަލުކުރެއްވުމުގައި އެމަނިކުފާނުގެ އަރިހުގައި މިނިސްޓަރ އޮފް ފިނޭންސް، އިބްރާހީމް އަމީރާއި މިނިސްޓަރ އޮފް އިކޮނޮމިކް ޑިވެލޮޕްމަންޓް، އަލްއުސްތާޛް ފައްޔާޟް އިސްމާޢީލާއި މިނިސްޓްރީ އޮފް ފޮރިން އެފެއާޒްގެ ސްޓޭޓް މިނިސްޓަރ އަޙްމަދު ޚަލީލާއި މިނިސްޓްރީ އޮފް ފޮރިން އެފެއާޒް އާއި ޓޯކިއޯގައި ހުންނަ ދިވެހި އެމްބަސީގެ ބައެއް އިސް ބޭފުޅުން ބައިވެރިވެވަޑައިގެންނެވިއެވެ.
ޝާހިދުގެ މިދަތުރުފުޅުގައި ވަނީ ޖަޕާނުގެ މިނިސްޓަރ އޮފް އިކޮނޮމީ، ޓްރޭޑް އެންޑް އިންޑަސްޓްރީ، ހިރޮޝިގޭ ސެކޯ އާ ވެސް ބައްދަލުކުރައްވައިފައެވެ. ޝާހިދުގެ މިދަތުރުފުޅަކީ މިމަހުގެ 19 އިން 24 އަށް ޖަޕާނަށް ކުރައްވާ ރަސްމީ ދަތުރުފުޅެކެވެ.
Japan in ehee dhenee vaki bayaku verikamuga thibeemaka noon. Komme bayaku verikamuga thibbas emeehun e dhey ehee eh dheyne.