ދިވެހި ސިފައިން އާންމުންނަށް ޚިދުމަތް ދެއްވުމުގައި ވީހާވެސް ބޮޑަށް ދެފުަސް ފެންނަ ގޮތަށް ޚިދުމަތް ދެއްވުމަށް ޑިފެންސް މިނިސްޓަރ މާރިޔާ އަޙުމަދު ދީދީ ދިވެހި ސިފައިންނަށް މިރޭ އިލްތިމާސް ކުރައްވައިފިއެވެ.
އެކަމަނާ ސިފައިންނަށް މި އިލްތިމާސް ކުރެއްވީ ސިފައިންނާ ބައްދަލު ކުރެއްވުމަށް ކަޅުތުއްކަލާ ކޮށީގައި މިރޭ ބޭއްވި ޚާއްސަ ރަސްމިއްޔަތުގައި ވާހަކަފުޅު ދައްކަވަމުންނެވެ. މިއީ މިނިސްޓަރު ކަމާ ޙަވާލުވެ ވަޑައިގެންނެވި ފަހުން ސިފައިންނާ ބައްދަލު ކުރެއްވި ފުރަތަމަ ފަހަރެވެ.
މި ރަސްމިއްޔާތުގައި މިނިސްޓަރ ވިދާޅުވީ ޤާނޫނޫ އަސާސީއިން ސިފައިންނާ މަތިކޮށްފައިވާ އެންމެހާ ކަންކަން ޤާނޫނީ ހަމަތަކުގެ މަތިން ހިނގާނުހިނގާގޮތް ބެއްލެވުމަކީ ޑިފެންސް މިނިސްޓަރުގެ އެންމެ ބޮޑު ޒިންމާ ކަމަށެވެ. އެކަމަނާ ވަނީ ސިފައިން ޤައުމަށް ޚިދުމަތް ކުރުމުގައި އަމާނާތްތެރިކަމާއެކު މަސްޢޫލިއްޔަތާއި ވާޖިބުތައް އަދާކުރެއްވުމަށް ވެސް އިލްތިމާސް ކުރައްވައިފައެވެ.
މިރަސްމިއްޔާތުގައި މަރުޙަބާއާއި ޝުކުރު ދެންނެވުމުގެ ގޮތުން ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމް ވާހަކަފުޅު ދެއްކެވިއެވެ.
މި ޚާއްސަ މިބައްދަލުވުމުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމްއާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޝާހިދުގެ އިތުރުން ޖެނެރަލް އޮފިސަރުންނާއި ޔުނިޓްތަކުގެ ކޮމާންޑަރުންގެ އިތުރުން ގިނައަދަދެއްގެ ސިފައިން ބައިވެރިވެފައިވެއެވެ.
މި ޖަލްސާ ނިންމާލާފައި ވަނީ ޚާއްޞަ ދުޢާއަކަށްފަހު ސިފައިންގެ ލަވައިންނެވެ. އަދި ޖަލްސާއަށް ޙާޟިރުވި ހުރިހާ ސިފައިންނާ ޑިފެންސް މިނިސްޓަރ ވަނީ ސަލާމްކުރައްވާފައެވެ.
