އައްޑޫސިޓީ މަރަދުއާއި ހިތަދުއާ ދެމެދު އޮންނަ ގައުކެނޑި ބްރިޖު ނުވަތަ ކޯޒްވޭ ކައިރިއަށް މޫދަށް އެރިއުޅުނު ތިންކުދިންގެ ތެރެއިން ކުއްޖަކު ގެއްލިގެން ހޯދަން ފަށައިފި ކަމަށް އެމްއެންޑީއެފުން ވިދާޅުވެއްޖެއެވެ.
މޫދަށް އެރިއުޅެނިކޮށް ގެއްލިފައިވަނީ ޢުމުރުން 18 އަހަރުގެ ކުއްޖެކެވެ. އޭނާ ގެއްލުނު ކަމަށްވަނީ އޮޔާދަމައިގަތުގެ ސަބަބުން ކަމަށް އެމްއެންޑީއެފުން ވިދާޅުވެފައިވެއެވެ. މިހާދިސާގެ މަޢުލޫމާތު އެމްއެންޑީއެފަށް ލިބިފައިވަނީ މިއަދު 2:43 އެހައިކަންހާއިރު ކަމަށް ވެސް ސިފައިން ވަނީ ވިދާޅުވެފައެވެ.
އެމްއެންޑީއެފްގެ ސަދަން އޭރިއާގެ ކޯސްޓްގާޑުގެ ލޯންޗާއި ޑައިވަރުން ގެންދަނީ ގެއްލުނު ކުއްޖާ ހޯދުމުގެ މަސައްކަތް ކުރަމުންނެވެ. އޭނާ ހޯދުމަށް ކަނޑުގެ ސަރަޙައްދު ވެސް ބަލަމުންދާ ކަމަށް އެމްއެންޑީއެފުން ވިދާޅުވިއެވެ.
ގެއްލުނު ކުއްޖާ ފެނިއްޖަކަށް އެމްއެންޑީއެފުން ވިދާޅުވެއްޖެއެވެ. އޭނާ ފެނިފައިވަނީ ކޯސްޓްގާޑުގެ ޑައިވަރުންނަށް ކަމާއި އެނާގޮވައިގެން ހިތަދޫ ރީޖަނަލް ހޮސްޕިޓަލަށް ގެންދިޔުމަށް މަސައްލަތް ކުރަމުން ކަމަށް ވެސް އެމްއެންޑީއެފުން ވިދާޅުވިއެވެ. އޭނާ ފެނިފައިވަނީ ކޮން ސަރަހައްދަކުން ކަމެއް އަދި ނޭނގެއެވެ.
އެ ކުއްޖާ ދާދި ދެންމެއަކު ވަނީ ހިތަދޫ ރީޖަނަލް ހޮސްޕިޓަލަށް ގެންގޮސްފައެވެ. ހޮސްޕިޓަލުން ވިދާޅުވީ އެކުއްޖާއޮތީ ހޭނެތިފައި ކަހަލަ ގޮތަކަށް ކަމަށެވެ. އަދި އިތުރު އެއްޗެއް ދަންނަނަވަން ނޭނގޭ ކަމަށެވެ.
