ހުވަދުއަތޮޅު ދެކުނުބުރީ ފަރެސްމާތޮޑާގައި އެއާޕޯޓު އެޅުމަށް ހިއްކަމުންދާ ސަރަހައްދުގައި ޖަހައިފައިވާ ހުރިހާ ބަންޑުވޯލެއް ގިރައިގެން ހިނގައްޖެއެވެ.
ބަންޑުވޯލްތައް ގިރައިގެން ގޮސްފައިވަނީ އިއްޔެ އެންމެ ދިޔަބޮޑުވި ވަގުތުގައެވެ. އެ ވޯލްތައް ގިރައިގެން ދިޔައީ ދިޔަބޮޑުވެ ރާޅުތައް އުފުލި އޮއިވަރު ގަދަވި ވަގުތުގައެވެ. އިއްޔެއާއި ރޭގެ ވަގުތެއްގައި އެރަށުގެ ބައެއް ސަރަހައްދު ތަކަށްވަނީ ކޮންމެވެސް ވަރަކަށް އުދަ ވެސް އަރައިފައެވެ.
ބަންޑުވޯލްތައް ގިރައިގެން ދިޔުމުން އަލުން ވޯލްތައް ޖެހުމުގެ މަސައްކަތް އެމްޓީސީސީން ކުރައްވާނެ ކަމަށް އާފަތިހަށްވަނީ މައުލޫމާތު ލިބިފައެވެ. އެހެންނަމަވެސް އެމަސައްކަތް އަލުން ފަށާނީ ކޮންއިރަކު ކަމެއް ނޭނގެއެވެ. ރާއ ްޖެއަށް މިހާރު ކުރަމުންދާ ވިއްސާރައިގައި އެރަށަށް ވެސް ދަނީ ގަދަވަޔާއެކު ވިއްސާރަ ކުރަމުންނެވެ. އެހެންކަމުން އެއާޕޯޓަށް ބޭނުންވާ ބިން ހިއްކުމަށް ވެސް ބޮޑެތިދަތިކަން ކުރިމަތިވަމުން އަންނަ ކަމަށްވެސް މައުލޫމާތު ވަނީ ލިބިފައެވެ. އެރަށުގައި އެއާޕޯޓު އަޅަނީ ކައިރިކައިރީގައި ހުރި ފަޅުރަށްރަށުގެ ތެރެއިން 5 ރަށެއް ގުޅުވާލައިގެންނެވެ.
ރާއްޖެއަށް މިހަރު ކުރަމުންދާ ވިއްސާރައިގައި ބައެއް ރަށްރަށަށް އުދައަރައިފާނެތީ ސަމާލު ވުމަށް މޫސުމާބެހޭ އޮފީހުން ވަނީ އިލްތިމާސް ކުރައްވައިފައެވެ.
ރޭވެސް ބައެއް ރަށްރަށަށް ވަނީ ކޮންމެވެސް ވަރަކަށް އުދަ އަރައިފައެވެ. އެގޮތުން އައްޑޫގެ ބައެއް ރަށްރަށަށް ވެސް ވަނީ އުދައަރައިފައެވެ.
