ހދ. ކުޅުއްދުއްފުށީ ކުޅިން ބައެއް ހިއްކައިގެން އެރަށުގައި ސަރުކާރުން ތަރައްގީ ކުރައްވާފައިވާ އެއާޕޯޓަށް ޓެސްޓް ފުލައިޓް މިއަދު ޖައްސައިފިއެވެ. މި ފުލައިޓް އެރަށުގެ އެއާޕޯޓަށް ޖައްސަވައިފައިވަނީ 3:11 ގައެވެ.
މިދަތުރުގައި ސަރުކާރުގެ އިސް ބައެއް ބޭފުޅުން ބައިވެރިވެ ވަޑައިގެންނެވެ. އޭގެ ތެރޭގައި ޓޫރިޒަމް މިނިސްޓަރާއި، ބަންޑާރަނާއިބާއި، ޗީފްއޮފް ޑިފެންސް ފޯސްއާއި މަޖިލީހުގެ ބައެއް މެމްބަރުން ހިމެނެއެވެ. މައުލޫމާތު ލިބިފައިވާ ގޮތުގައި ޓެސްޓް ފުލައިޓް ކާމިޔާބެވެ. ބޯޓު އެއާޕޯޓަށް ތިރިކުރިއިރު އެމަންޒަރު ބަލަންވެސް އެރަށުގެ ގިނަ މީހުން އެއްވެފައިވެއެވެ.
ރައީސް ޔާމީން ރޭ ވިދާޅުވެފައިވަނީ މިސަރުކާރުން މިހާރުވެސް 12 އެއާޕޯޓެއްގެ މަސައްކަތް ކުރައްވަމުން ގެންދަވާ ކަމަށެވެ. ކުޅުދުއްފުށީ އެއާޕޯޓަކީ އެރަށުން 15 ހެކްޓަރުގެ ބިން ހިއްކައިގެން ތަރައްގީ ކޮށްފައިވާ އެއާޕޯޓެވެ. ޓެސްޓް ފުލައިޓް އެރަށް މިއަދު ޖެއްސުމުން ރައީސް ޔާމީން ވިދާޅުވެފައިވާ ގޮތަށް އެރަށުގެ މީހުން ވޯޓުލާން ރަށަށް ދިޔުމުގެ ފުރުސަތު މިހާރު މިވަނީ ހުޅުވިގެން ގޮސްފައެވެ.
މިއީ 1200 މީޓަރު ދިގު 30 މީޓަރުފުޅާ ރަންވޭ އަކާއެކު ތަރައްގީ ކޮށްފައިވާ އެއާޕޯޓެކެވެ. އެތަނަށް 53.4 މިލިއަން ރުފިޔާވަނީ ޚަރަދު ކޮށްފައެވެ.
ކުޅުދުއްފުށީގައި އެއާޕޯޓެއް ހެދުމަކީ ރައީސް ޔާމީން 2013 ވަނަ އަހަރު ވެވަޑައިގެންފައިވާ ވައުދެކެވެ. އެއާޕޯޓު އަޅަން ބޭނުންވާ ބިން ހިއްކަން ފެށީ މިދިޔަ އަހަރު ނޮވެމްބަރު 12 ވަނަ ދުވަހުއެވެ. ބިންހިއްކައި ނިމިފައިވަނީ މިއަހަރު ޖެނުއަރީމަހުގެ 4 ވަނަ ދުވަހުއެވެ.
ކުޅުދުއްފުށްޓަށް ޓެސްޓް ފުލައިޓް ޖެއްސިއަސް ޝެޑިއުލް ފުލައިޓްތައް ފަށާނެ ދުވަހެއް އަދި އެނގިފައެއް ނުވެއެވެ. އެހެންނަމަވެސް މާދަމާއިން ފެށިގެން ޗާޓަރ ފުލައިޓްތައް ޖެއްސޭނެ ކަމަށް ޓޫރިޒަމް މިނިސްޓަރ މޫސާ ޒަމީރު ވިދާޅުވިއެވެ.
