ރައީސުލްޖުމްހޫރިއްޔާގެ އޮފީހުން މިނިސްޓްރީ އޮފް ފިނޭންސް އެންޑް ޓްރެޒަރީއަށް ފޮނުއްވާފައިވާކަމަށް ބުނެ، ސޯޝަލް މީޑިޔާގައި ރައީސުލްޖުމްހޫރިއްޔާގެ އޮފީހުގެ ލެޓަރހެޑްގައި، ދައުރުވަމުންދާ ސިޓީއަކީ ރައީސުލްޖުމްހޫރިއްޔާގެ އޮފީހުގެ ސިޓީއެއް ނޫންކަމަށް އެއޮފީހުން މިވާޅުވެއްޖެއެވެ.
އެސިޓީގައި ބުނެފައިވަނީ ރިޓަޔަރކުރާ އުމުރުގެ މީހުންނަށް ދައުލަތުގެ ބަޖެޓުންދޭ ފައިސާ 2019 ވަނަ އަހަރުގެ ބަޖެޓުގައި ނުހިމެނޭ ކަމަށް ބުނެފައެވެ. އެހެންނަމަވެސް ރައީސް އޮފީހުން ވިދާޅުވެފައިވަނީ 2019 ވަނަ އަހަރުގެ ބަޖެޓާބެހޭ ގޮތުން އެއްވެސް ފަރާތަކަށް އެއްވެސް އިރުޝާދެއް މިހާތަނަށް ދެއްވާފައި ނުވާނެ ކަމަށެވެ.
އޭގެ އިތުރަށް އެސިޓީގައި ޖަހައިފައިވާ ނަމްބަރަކީ ރައީސް އޮފީހުން ޓޫރިޒަމް މިނިސްޓްރީއަށް ފޮނުއްވާ ސިޓީތަކުގައި ބޭނުންކުރާ ނަމްބަރު ކަމަށް ވެސް ރައީސް އޮފީހުން ވިދާޅުވެފައިވެއެވެ. "މި ސިޓީގައި ޖަހާފައިވާ ނަމްބަރަކީ ދައުލަތުގެ ސިޓީތަކުގައި ނަމްބަރުޖަހާ އުސޫލުތަކަށް ބަލާއިރު މި އޮފީހުން މިނިސްޓްރީއޮފް ޓޫރިޒަމަށް ފޮނުވާސިޓީގައި ޖަހާ ނަމްބަރެވެ. އަދި ސިޓީގައިވާ ނަމްބަރުގައި މިއޮފީހުން އެއްވެސް ތަނަކަށް ސިޓީއެއް ފޮނުވައިފައިނުވެއެވެ." ރައީސް އޮފީހުން ނެރެފައިވާ ނޫސްބަޔާނެއްގައި ވިދާޅުވެފައިވެއެވެ.
އެ ސިޓީގައި ލިޔެފައިވާ ވާހަކަތަކަކީ މިއަހަރު އޮގަސްޓްމަހުގެ 7 ވަނަ ދުވަހު ގދ.ފަރެސްމާތޮޑާއަށް ރައީސް ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރިޓަޔަރމަންޓް އުމުރު 65 އަހަރުން 74 ނުވަތަ 75 އަހަރަށް ބަދަލުކުރައްވާނޭ ކަމުގައި ވިދާޅުވި ވިދާޅުވުމުގެ މާނަ އޮޅޭގޮތަށް ފަތުރަމުންދާ ވާހަކަތަކެއް ކަމަށް ވެސް ރައީސް އޮފީހުން ވިދާޅުވެފައިވެއެވެ.
އެއީ "މި އުމުރު ބަދަލު ކުރުމުން މިހާރު ދިވެހިކޮންމެ ރައްޔިތަކަށް 65 އަހަރުވުމުން ލިބެމުންދާ 5000 ރުފިޔާގެ އެލަވަންސް ކަނޑައިލާނެ ކަމަށް ބުނެ ފަތުރަމުންދާ ވާހަކަތަކަށް ބާރުލިބޭގޮތަށް ތައްޔާރުކޮށްފައިވާ ސިޓީއެއް ކަންވެސް ފާހަގަ ކުރަންޖެހެއެވެ." ރައީސް އޮފީހުން ވިދާޅުވެފައިވެއެވެ.
65 އަހަރު ފުރިފައިވާ މީހުންނަށް ލިބޭ ފައިސާ އެއްވެސް ގޮތަކަށް ދަށްނުކުރައްވާނެ ކަމަށް މިއަހަރުގެ ޖުލައިމަހުގެ 11 ވަނަ ދުވަހު ރައީސް ވަނީ މ.ކޮޅުފުށީގައި ވިދާޅުވެފައެވެ. އޭގެ ބަދަލުގައި އެފައިސާވާނީ އިތުރު ކަމަށް ވެސް ވަނީ ވިދާޅުވެފައެވެ.
"މި މައްސަލައަށް ބަލާއިރު މިހާރުވެސް 65 އަހަރުން މަތީގެ މުވައްޒަފުން ދައުލަތުގެ އެކި މުއައްސަސާތަކުގައި ޚިދުމަތް ކުރައްވަމުންދާކަމާއި މިފަދަ އެއްވެސް މީހެއްގެ އެލެވަންސް އުނިކޮށްފައިނުވާކަން ފާހަގަކުރަމެވެ." ރައީސް އޮފީހުން ވިދާޅުވެފައިވެއެވެ. އެހެން ކަމުން ރައްޔިތުންގެ މެދުގައި ހަގީގަތް އޮޅޭ ގޮތަށް ވާހަކަ ނުފެތުރުމަށް ރައީސް އޮފީހުންވަނީ އިލްތިމާސް ކުރައްވައިފައެވެ.
