ކިނބިދޫ ދާއިރާގެ މެމްބަރު އަދި ކުރީގެ ޕޮލިސް ކޮމިޝަނަރު ޢަބްދުﷲ ރިޔާޒު މީހާރު ބަންދުގައި ހުންނެވީ އެއްވެސް ގާނޫނީ އަސާސެއްގެ ދަށުން ނޫންކަމަށް އޭނާގެ ވަކީލުން ވިދާޅުވެއްޖެއެވެ.
ރިޔާޒުގެ ވަކީލުން ނެރެފައިވާ ނޫސްބަޔާނެއްގައި ބުނެފައިވަނީ ރިޔާޒުގެ މައްޗަށް ދިވެހިރާއްޖޭގެ ހައިކޯޓުން ހުކުމް ކުރައްވައިފައިވަނީ މިއަހަރުގެ އޭޕްރީލްމަހުގެ 24 ވަނަ ދުވަހު ކަމަށެވެ. "ހުކުމް ތަންފީޒު ކުރުމަށް ކަރެކްޝަނަލް ސަރވިސްއިން ދޫކޮށްފައިވާ ޗިޓްގައި ޢަބްދުﷲ ރިޔާޒްގެ ހުކުމް ތަންފީޒުކޮށް ނިމޭ ތާރީޚުކަމުގައި ބަޔާންކޮށްފައިވަނީ 15 ސެޕްޓެމްބަރު 2018 އެވެ. އެހެންކަމުން މިއަދު ( 15 ސެޕްޓެމްބަރު) ގެ 14:00 އަށް އެމުއްދަތު ހަމަވެފައިވާތީ އެވަގުތުން ފެށިގެން ޢަބްދުﷲ ރިޔާޟް ކަރެކްޝަނަލް ސަރވިސްގެ ބެލުމުގެ ދަށުގައި ބަންދުގައި ބަހައްޓާފައިވަނީ ޤާނުނީ އެއްވެސް އަސާސެއް ނެތި އާރބިޓްރަރީކޮށް ކަމުގައި އަޅުގަނޑުމެން ދެކެމެވެ." ގާނޫނީ ޓީމުގެ ބަޔާނުގައިވެއެވެ.
"ޢަބްދުﷲ ރިޔާޒު މިވަގުތު ބަންދުން ދޫނުކޮށް ހިފަހައްޓާފައިވަނީ ހައިކޯޓުން ޙުކުމްކުރުމުގެ ކުރިން ކޯޓުން ބަންދުގައި ބެހެއްޓުމަށް ނެރެފައިވާ އަމުރުތަކަށް ރިޢާޔަތްކޮށްކަމަށް ކަރެކްޝަނަލް ސަރވިސްއިން މިއަދުގެ ވަގުތެއްގައި އެމަނިކުފާނަށް އަންގާފައިވެއެވެ. ނަމަވެސް ޝަރީޢަތުން ކޮށްފައިވާ ޙުކުމެއް ތަންފީޒުކުރުމަށް ބަދަލުކުރެވޭ ހިސާބުން ފެށިގެން އޭގެ ކުރިން އެމީހާގެ މައްޗަށް އެހެން ހުރިހާ މައްސަލަތަކެއްގައި ކޮށްފައިވާ ބަންދު އަމުރުތައް ބާޠިލުވެގެންދާކަމީ އެޔާމެދު ދެބަސްނުވެވޭނޭ ކަނޑައެޅިގެން އެނގެން އޮތް ސާފު ޢަމަލީ އުޞޫލެކެވެ. އަދި އެއީ މިއަދާ ހަމައަށް ވެސް މޯލްޑިވްސް ޕޮލިސް ސަރވިސްއާއި މޯލްޑިވްސް ކަރެކްޝަނަލް ސަރވިސްއިން ޢަމަލުކުރަމުން ގޮސްފައިވާ ޤާނޫނީ ޢުރުފެކެވެ."
އެ ބަޔާނުގައި ބުނެފައިވަނީ ޢަބްދުﷲ ރިޔާޟް ބަންދުގައި ބެހެއްޓުމުގައި ކަރެކްޝަނަލް ސަރވިސްއިން ރިޢާޔަތް ކުރައްވާފައިވާ މައްސަލަތަކުގެ ޝަރީޢަތް އަދިވެސް ނުފެށޭ ކަމަށެވެ. އެހެންކަމުން އެއީ ޝަރީޢަތް ފެށުމުގެ "ލިމިޓޭޝަން ޕީރިއަޑް" ހަމަވެފައިވާ ބާޠިލު މައްސަލަތަކެއް ކަމަށް ވެސް އެބަޔާނުގައި ވެއެވެ. އެހެން ކަމުން ލިމިޓޭޝަން ހަމަވެފައިވާ އެންމެހާ މައްސަލަތައް، އަނބުރައި ގެންދިއުމަށް ޕްރޮސިކިއުޓަރ ޖެނެރަލަށް ވެސް ވަކީލުން ވަނީ ގޮވައިލައްވައިފައެވެ.
މީގެ އިތުރުން ޢަބްދުﷲ ރިޔާޟްގެ މައްޗަށް ދިވެހިރާއްޖޭގެ ހައިކޯޓުން 4 މަހާއި 24 ދުވަހަށް ޖަލަށްލުމަށް ކުރި ޙުކުމް ދިވެހިރާއްޖޭގެ ސުޕްރީމް ކޯޓުގައި އިސްތިއުނާފްކުރުމުން ޙުކުމް ތަންފީޒުކޮށް ނިމެން 72 ގަޑިއިރަށް ވުމުން އެމައްސަލަ ބަލައި ނުގަތުމަށް ދިވެހިރާއްޖޭގެ ސުޕްރީމް ކޯޓުން އަންގާފައިވާ ކަމަށް ވެސް އެބަޔާނުގައި ބުނެފައިވެއެވެ. ސުޕްރީމް ކޯޓުން އެ މައްސަލަ ބަލައި ނުގަތުމަށް ނިންމަވާފައިވަނީ މައްސަލައާ ގުޅޭގޮތުން އެއްވެސް އަޑުއެހުމެއް ވެސް ބޭއްވުމެއް ނެތި ކަމަށްވެސް ބަޔާނުގައި ވެއެވެ. "ޝަރީޢަތް ކުރުމުގައި ރިޢާޔަތް ކުރެއްވުމަށް މާތްﷲ ބާވައިލެއްވި ގޮތަކީ މިއީ ކަމުގައިވާނަމަ، ޢާބްދުﷲ ރިޔާޒުގެ ފަރާތުންކުރާނެ ހަމަ އެއްވެސް ޝަކުވާއެއްނެތެވެ."
"ޢަބްދުﷲ ރިޔާޟް ޖަލަށްލުމަށް ހައިކޯޓުން ޙުކުމްކުރީ ޢަބްދުﷲ ރިޔާޟް ކްރިމިނަލް ކޯޓުގެ ޝަރީޢަތުގެ މަޖިލީހުގައި ފުލުހުންނަށް ޕިންކޯޑުދީ އެޕިންކޯޑުން ފޯނު ހުޅުވާފައިވަނިކޮށް، ޕިންކޯޑު ފުލުހުންނަށް ދީފައިނުވާކަމަށް ކަނޑައަޅާކަން މިފުރުސަތުގައި ފާހަގަކުރަމެވެ." ވަކީލުން ވިދާޅުވެފައިވެއެވެ.
ޢަބްދުﷲ ރިޔާޟްގެ ޙުކުމް ތަންފީޒުކޮށް ނިމުމުންވެސް މިނިވަން ނުކޮށް އެކަމަށް އިރުޝާދު ދިން ފަރާތްތަކާއި އަދި އެޢަމަލު ތަންފީޒުކުރި ފަރާތްތަކާމެދު ޤާނޫނީ ފިޔަވަޅު އެޅިގެންދާނެ ކަމަށް ހަނދާން ކޮށްދެއްވާ ކަމަށް ވެސް އެބަޔާނުގައި ވަކީލުން ވިދާޅުވެފައިވެއެވެ.
