ރައީސް ޔާމީންގެ ދެންއަންނަ ފަސްއަހަރުގައި ރާއްޖޭގެ އާމްދަނީ ތިރީސް ބިލިއަނަށްވުރެ އިތުރުވެގެންދާނެ ކަމަށް ތިމާއްވެއްޓާ ބެހޭ މިނިސްޓަރު ތާރިގު އިބްރާހީމް ވިދާޅުވެއްޖެއެވެ.
ފުވައްމުލަކު ސިޓީގައި މިހާރު ހިނގަމުންދާ ޖަލްސާގައި ވާހަކާފުޅު ދައްކަވަމުން މިނިސްޓަރ ވިދާޅުވީ އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ގެ ވެރިކަމުގައި ދައުލަތުގެ އާމްދަނީ 30 ބިލިއަނަށް އިތުރު ކޮށްދެއްވާނެ ކަމަށެވެ. އެހެންނަމަވެސް އެމަނިކުފާނު އެހެން ވިދާޅުވީ އެއްވެސް ހިސާބެއް ހެއްދެވުމަކާ ނުލައި ކަމަށް ވިދާޅުވިއެވެ. ރައީސް ޔާމީންގެ ރިޔާސީ ދެވަނަ ދައުރުގައި އެއާޕޯޓުގެ މަސައްކަތް ނިންމައި އޮޕަރޭޝަނަށް ނެރެ އަދިވެސް ތަރައްގީގެ އެހެން މަޝްރޫއުތަކާއެކު ދައުލަތުގެ އާމްދަނީ ސާޅީސް ބިލިއަނަށްވުރެ ވެސް މަތިވެގެންދާނެ ކަމަށެވެ.
ރާއްޖޭގައި އާބަން ސެންޓަރުތަކެއް ގާއިމް ކުރައްވާނެ ކަމަށް އިބޫ ވިދާޅުވި ކަމަށާއި އެހެންނަމަވެސް ރައީސް ޔާމީން މިހާރުވެސް ވަނީ ކުޅުދުއްފުށި އާބަން ސެންޓަރެއްގެ ގޮތުގައި ތަރައްގީ ކުރައްވަން ފަށްޓަވައިފައި ކަމަށެވެ. ރާއްޖޭގައި އިތުރު ސިޓީތައް ހަދައި ތަރައްގީ ކުރައްވާނެ ކަމަށް ރައީސް ވިދާޅުވެފައިވާ ކަމަށް ވެސް ތާރިގު ވިދާޅުވިއެވެ. "ތިނަދޫ ވެސް ފުވައްމުލަކު ސިޓީވެސް އައްޑޫ ސިޓީ ވެސް އާބަން ސެންޓަރަކަށް ވެގެންދާނެ. އިދިކޮޅުން ހަދާނެ އާބަން ސެންޓަރުތަކެއް ނޯންނާނެ،" ތާރިގު ވިދާޅުވިއެވެ.
އިދިކޮޅުން ގެސްޓް ހައުސްގެ ވިޔަފާރިވެސް ދައްކަވާނެ ކަމެއްނެތް ކަމަށް މިނިސްޓަރ ވިދާޅުވިއެވެ. ފާއިތުވި ފަސްއަހަރު މިސަރުކާރުންވަނީ 300 އަށްވުރެ ގިނަ ގެސްޓް ހައުސް އަލަށް ހަދައި، ފާސް ހާހަށްވުރެ ގިނަ އެނދު އިތުރުކޮށްފައި ކަމަށް ވެސް މިނިސްޓަރ ވިދާޅުވިއެވެ.
ތާރިގު ވިދާޅުވީ އިދިކޮޅު ފަރާތްތަކުން ފުވައްމުލަކަށް ތަރައްގީއެއް ނުގެންނެވޭނެ ކަމަށެވެ. މިރޭ އިފްތިހާހު ކޮށްދެއްވި މަޝްރޫއުތަކުގެ އިތުރަށް ރަށްގިރުމުގެ މައްސަލަ ހައްލު ކުރުމަށް ބޮޑު ތޮއްޓެއް ފުވައްމުލަކުގައި ލުމަށް މިސަރުކާރުން ނިންމާފައިވާ ކަމަށް މިނިސްޓަރ ވިދާޅުވިއެވެ.
އިދިކޮޅު ފަރާތްތަކުން ރަށްރަށަށް ގޮސް ތިމަންނަމެންނަކީ ބޮޑުފަޅިއޭ ބުނެ ރައްޔިތުންނަށް ބިރު ދައްކަމުން ކަމަށް ވެސް މިނިސްޓަރ ވިދާޅުވިއެވެ. "ބޮޑުފަޅިއަކީ ޕީޕީއެމްފަޅި. ބޮޑުފަޅިއަކީ އެއް ނަމްބަރު ފަޅި. އެއީ ރައީސް ޔާމީންގެ ފަޅި،" މިނިސްޓަރ ވިދާޅުވިއެވެ. އެގޮތަށް ދައްކާ ބިރަކަށް އެއްވެސް ރައްޔިތަކު ޖެހިލުމެއްނުވެ ރައީސް ޔާމީނަށް ވޯޓު ދެއްވުމަށް އެމަނިކުފާނު ވިދާޅުވިއެވެ.
މިނިސްޓަރ ވިދާޅުވީ "ރައީސް ޔާމީނަކީ އަޅުގަނޑުމެންގެ އުންމީދު، ކުރިއެރުން. ރައީސަށް ވޯޓު ދީފިއްޔާ ފުވައްމުލަކު ރައްޔިތުންގެ އުންމީދުގައި ކުލަޖެހުނީ،" ކަމަށެވެ.
