ދ. ކުޑަހުވަދޫގައި ހުންނަ އެ އަތޮޅު ތައުލީމީ މަރުކަޒުގެ 3 ބުރީގެ 9 ކްލާސްރޫމް ހިމެނޭ އިމާރާތުގެ ނުނިމިހުރި މަސައްކަތް ނިންމުމަށް ބަޔަކާ ހަވާލުކުރައްވައިފިއެވެ.
އެ މަސައްކަތް ނިންމުމުގެ އެއްބަސްވުމުގައި ސޮއިކުރައްވައިފައިވަނީ އިއްޔެއެވެ. އެ މަސައްކަތް ހަވާލުކޮށްފައިވަނީ ބްރައުނީ ބްރަދާރސް ޕްރިވެޓް ލިމިޓެޑާއެވެ. އެޑިއުކޭޝަން މިނިސްޓްރީގައި އޮތް އެ ރަސްމިއްޔާތުގައި ބްރައުނީ ބްރަދާރސް ޕްރިވެޓް ލިމިޓެޑް ފަރާތުން ސޮއިކުރެއްވީ މެނޭޖިންގް ޑިރެކްޓަރ އަލީ ރަޝީދު އިބްރާހީމެވެ. މިނިސްޓްރީ އޮފް އެޑިޔުކޭޝަންގެ ފަރާތުން ސޮއިކުރެއްވީ ސީނިއަރ ޕޮލިސީ އެގްޒެކްޓިވް، އިބްރާހީމް އިސްމާއީލެވެ.
މި މަސައްކަތް ނިންމަން އެއްބަސްވެފައިވަނީ 365 ދުވަހުގެ ތެރޭގައެވެ. މަސައްކަތުގެ އަގަކީ ފަސް މިލިއަން އަށް ލައްކަ ރުފިޔާއެވެ. އެ ރަސްމިއްޔާތުގައި ވާހަކަފުޅު ދައްކަވަމުން އިބްރާހީމް އިސްމާއިލް ވިދާޅުވީ 2019 ވަނަ އަހަރުގެ އޮގަސްޓް މަހު ޢިމާރާތުގެ މަސައްކަތް މުޅިން ނިމި ބޭނުން ކުރަން ފެށޭނެ ކަމަށެވެ. ދ.އަތޮޅު ތައުލީމީ މަރުކަޒުގައި 787 ދަރިވަރުން ދަނީ ތަޢުލީމު ހާސިލް ކުރަމުންނެވެ.
އެ ސްކޫލުގައި މިހާރު 28 ކުލާސް ރޫމާއި، ސްޓާފް ރޫމަކާއި، ލައިބްރަރީއަކާއި، ދަރިވަރުންނަށް ޚާއްސަ 17 ފަޚާނާއި، މުވައްޒަފުންނަށް ޚާއްސަ 3 ފާޚާނާއި، އޭވީ ރޫމަކާއި، އޮފީހަކާއި، ޑެޕިއުޓީ ޕުރިންސިޕަލަށް ޚާއްސަ ރޫމަކާއި، ސައިންސްލެބަކާއި، ކޮމްޕިޔުޓަރ ލެބަކާއި، މީޓިންގް ރޫމަކާއި ހޯލެއް އޮވެއެވެ.
