މާލޭގެ ފިހާރައެއްގައި އަލިފާނުގެ ހާދިސައެއް ހިނގައިފި ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވީ އަލިފާނުގެ ހާދިސާ ހިނގާފައިވަނީ މަޖީދީ މަގާއި ޗާންދަނީ މަގު ގުޅޭ ކަންމަތީގައިހުރި "ކޮމް ޝޮޕް" ކިޔާ ފިހާރައެއްގައި ކަމަށެވެ.
މިހާދިސާގެ މައުލޫމާތު ސިފައިންނަށް ލިބިފައިވަނީ މިރޭ 3:22 ގައެވެ. މައުލޫމާތު ލިބުމުން އެމްއެންޑީއެފުން އެތަނަށްގޮސް ފެންޖަހައިގެން އަލިފާން ނިއްވައިފި ކަމަށް އާޒިމް ވިދާޅުވިއެވެ.
މިހާތަނަށް އެނގިފައިވާ ގޮތުގައި އެފިހާރައިގައި ރޯވެފައިވަނީ ކަރުދާސް ފައިލް ތަކެއްގައި ކަމަށް ވެސް އޭނާ ވިދާޅުވިއެވެ. އަލިފާން ނިއްވާފައިވަނީ 3:28 ގައި ކަމަށް ވެސް އާޒިމް ވިދާޅުވިއެވެ.
މިހާދިސާގައި އެއްވެސް މީހަކަށް އަދި އިތުރު އެއްޗަކަށް ގެއްލުން ވެފައިވާ ކަމަށް އާޒިމް ވިދާޅެއް ނުވެއެވެ.
