ކޮރަޕްޝަންގެ މައްސަލައެއްގައި މިހާރު ޖަލު ހުކުމެއް ތަންފީޒުކުރައްވަމުން ގެންދަވާ ބްރެޒިލްގެ ކުރީގެ ރައީސު ލުއިޒް އިނާސިއޯ ލޫލާ ޑަސިލްވާ، ރިޔާސީ އިންތިޚާބުގައި ވާދަކުރެއްވުމަށްޓަކައި ކުރައްވަމުން ގެންދެވި ގާނޫނީ ހަނގުރާމަ ދޫކޮށްލައްވައިފިއެވެ.
ލޫލާ ޑަސިލްވާގެ ޕާޓީ، ބްރެޒިލްގެ ވާކާސް ޕާޓީ (ޕީޓީ) ގެ ފަރާތުން ލޫލާ ޑަސިލްވާގެ ބަދަލުގައި އިންތިޚާބުގައި މިހާރު ވާދަކުރައްވާނީ ފެނާންޑޯ ހައްދާދެވެ. ލޫލާ ޑަސިލްވާ ބަންދުކުރެވިފައި ހުންނެވި ރަށް، ކުރިޓީބާ ގައި މިކަން އިއުލާންކުރެއްވީ ވާކާސް ޕާޓީގެ ރައީސު ސެނެޓަރު ގްލެއިސީ ހޮފްމަންއެވެ. އަންނަ އޮކްޓޯބަރު މަހު ބޭއްވުމަށް ހަމަޖެހިފައިވާ އިންތިޚާބުގައި ހައްދާދު ކުރިން ވާދަކުރައްވާގޮތަށް އޮތީ ލޫލާ ޑަސިލްވާގެ ރަނިންމޭޓެެއްގެ ގޮތުގައެވެ.
ބްރެޒިލްގެ ސިޔާސީ މައިދާނުގައި ފާއިތުވި ސާޅީހަކަށް އަަހަރު އެންމެ ވަރުގަދަ ސިޔަސީ އެެއް ލީޑަރުގެ ގޮތުގައި ހުންނެވި ލޫލާ ޑަސިލްވާ ޖަލުގައި އޮންނެވި އިރުވެސް އޭނާއަކީ މިއިންތިޚާބުގައި ވާދަކުރައްވާ ކެންޑިޓޭޓުންގެ ތެރެއިން އެންމެ މަގުބޫލު ބޭފުޅާއެވެ. ނަމަވެސް ގާނޫނީ ހުރަސްތަކުގެ ސަބަބުން އޭނާ ފަހަތަށް ޖެހިވަޑައިގަތުމުން، ދެން އޭނާ ހުސްކުރެއްވި ޖާގައަށް ވަޑައިގަތް ހައްދާދަކީ ބްރެޒިލްގެ ދެކުނު ފިޔަވައި އެހެން ސަރަހައްދުތަކުގެ މީހުން މާބޮޑަށް ފަރިތަ ބޭފުޅެއް ނޫނެވެ. އަނެއްކޮޅުން އޭނާ ވާދަކުރައްވަން މިޖެހެނީ މިހާރު ބްރެޒިލްގެ އާއްމުންގެ މެދުގައި އެންެމެ މަގުބޫލުކަަން ބޮޑު ޖައިރް ބޮލްސޮނާރޯއާއެވެ.
ލެބެނާނުން ބްރެޒިލަށް ހިޖުރަކުރި އަރަބި އޯތޮޑޮސް ކްރިސްޓިއަން ބައްޕައަކާއި މަންމައަކަށް އުފަން އުމުރުފުޅުން 58 އަހަރުގެ ފެނާންޑޯ ހައްދާދަކީ 2013 އިން 2017 އަށް ސައޮޕައޮލޯގެ މޭޔަރުކަން ކުރެއްވި ބޭފުޅެކެވެ. އޭނާއަަކީ ގާނޫނީ ވަކީލެކެވެ. ގާނޫނީ ދާއިރާއިން ފުރަތަމަ ޑިގްރީ ހާސިލުކުރައްވާފައިވާ ހައްދާދު މާސްޓާސް ޑިގްރީ ހާސިލުކުރައްވާފައިވަނީ އިކޮނޮމިކްސްއިންނެވެ. އަދި ޕީއެޗްޑީ ހާސިކުރައްވާފައި ވަނީ ފިލޯސަފީންނެވެ.
ކައިވެނި ބައްޕަވައިގެން ދެ ކުދިން ލިބިވަޑައިގެންފައިވާ ހައްދާދަކީ ސައޮަޕައޮލޯގެ މޭޔަރަށް ހުންނަވައިގެން ރިސައިކަލްކުރުމާއި، ގެދޮރު ނެތިފައި ތިބިމީހުނަށް ބޯހިޔާވަހިކަން ހޯދައިދިނުމާއި، މަސްތުވާތަކެތީގެ ވަބާގައި ޖެހިފައި ތިބި ޒުވާނުންގެ މައްސަލަތައް ހައްލުކުރުމަށް ކުރެއްވި މަސައްކަތްޕުޅުގެ ސަބަބުން އާއްމުންގެ ތައުރީފު ހޯއްދަވާފައެވެ.
"ނުހައްގުން މީހަކު ޖަލަށް ލެވިދާނެއެވެ. އެކަމަކު އޭނާގެ ފިކުރު ޖަލަށް ނުލެވޭނެެއެވެ. އަހަރުމެންނަކީ އެތައް މިލިއަން ލޫލާއެކެވެ. އަދި މިއަދުން ފެށިގެން ފެނާންޑޯ ހައްދާދު ވެވަޑައިގަންނަވާނީ ބްރެޒިލްގެ އެތައް މިލިއަން ބައެއްގެ ލޫލާއަކަށެވެ." ރިޔާސީ އިންތިޚާބުން ފަހަތަށް ޖެހިވަޑައިގަތުމަށް ފަހު ލޫލާ ޑަސިލްވާ އޭނާއަށް ތާއީދުކުރާ ފަރާތްތަކަށް ފޮނުވި ސިޓީގައި ވެއެވެ.
