ޗައިނާގެ އެންމެ ހުޅަނގުގައި އޮންނަ ޕްރޮވިންސު ޝިންޖިއާންގގެ މުސްލިމުންނާ ދެކޮޅަށް ފުޅާ ދާއިރާއެއްގައި ލާއިންސާނީ އަމަލު ހިންގަނީ އާޓިފިޝަލް އިންޓެލިޖެންސާއި، ބަޔޯމެޓްރިކްސްއާއި، ފޯން ސްޕައިވެއާ ފަަދަ ވަސީލަތްތައް ބޭނުންކޮށްެގެން ކަމުގައި ހިއުމަން ރައިޓްސް ވޮޗުން ބުނެފިއެވެ.
'އިރެޑިކޭޓިންގ އައިޑޮލޮޖިކަލް ވައިރަސަސް: ޗައިނާސް ކެމްޕޭން އޮފް ރިޕްރެޝަން އެގެއިންސްޓް ޝިންޖިއާންގސް މުސްލިމްސް' ގެ ނަމުގައި އިއްޔެ އެ ޖަމްއިއްޔާއިން ނެރުނު 117 ސަފުހާގެ ރިޕޯޓުގައި ވާގޮތުން އުއިގޫރީ އަދި ކަޒާކް ދަރިކޮޅަށް ނިސްބަތްވާ އެތައް ލައްކަ މުސްލިމުންނެއް ވަނީ ދައުވާއެއް ނުވަތ ޝަރީއަތެއް ކުރުމަކާ ނުލައި 'ހައްދުފަހަނައަޅައި ދިއުން ނައްތާލުމުގެ' ނަމުގައި ހިންގޭ ކޭންޕުތަކުގައި ބަންދުކޮށްފައެވެ
ހިއުމަން ރައިޓްސް ވޮޗްއިން ޗައިނާއަށް ކަނޑައަޅާފައި ހުންނަވާ ޑިރެކްޓަރު ސޯފީ ރިޗަޑްސަން ވިދާޅުވީ މުސްލިމުން ދެނެގަނެ އެބައިމީހުން ލާއިންސާއިންސާނީ އަނިޔާގެ ޝިކާރައަކަށް ހެދުމަށް ޗައިނާ ސަރުކާރުން ދަނީ ބަޔޯމެޓްރިކްސް މައުލޫމާތާއި، އަޑުގެ ސާމްޕަލްތައް ފުޅާ ދާއިރާއެެއްގައި ބޭނުންކުރަމުންނެވެ.
ރިޕޯޓު ބުނާގޮތުން ކޭންޕުތަކުގައި ހައްޔަރުކޮށްފައި ތިބޭ މީހުންނަށް ސަރުކާރުގެ ޕްރޮޮޕެގެންޑާގައި ބައިވެރިވުމާއި، ރައީސު ޝީ ޖިން ޕިންގއަށް ސަނާކިއުމާއި، ޗައިނީސް މެންޑަރީން ބަސް ދަސްކުރުން ފަދަ ކަންކަމަށް މަޖުބޫރުކުރެއެެވެ. ދެކޮޅުހަދައިފިނަމަ އަދަބުދެއެއެވެ. އަދި އަނިޔާވެސް ކުރެއެވެ.
ޗައިނާގެ މުސްލިމުންނާ ބެހޭ މި ރިޕޯޓު ތައްޔާރުކުރުމަށް އެ ޖަމްއިއްޔާއިން މައުލޫމާތު ނަގާފައިވަނީ 2104 ވަނަ އަހަރު 'ޓެރަރިޒަމް ނައްތާލަން' ޗައިނާއިން ކުރިއަށް ގެންދިޔަ އޮޕަރޭޝަންގައި ހައްޔަރުވެ އަދަބުލިބުމަށް ފަހު ސަލާމަތްވެފައިވާ 58 މުސްލިމަކާ ކުރެވުނު އިންޓަވިއުތަކުންެނެވެ. މި މައުލޫމާތުތައް ނަގާފައިވަނީ މިއަަހަރުގެ މާރިޗު މަހާއި އޯގަސްޓު މަހާއި ދެމެދުގައެވެ.
މި ކޭންޕުތަކުގައި ހައްޔަރުނުވެ އުޅޭ މުސްލިމުންނަށްވެސް އާދައިގެ ދިރިއުޅުމެއް ނޫޅެވެއެެވެ. ޕާސްޕޯޓު ހިފެހެއްޓުމާއި، ޗެކްޕޮއިންޓުތަކުން ފާސްކުރުމާއި، ސަރުކާރުން ބާއްވާ ހަރަކާތްތަކުގައި ކޮމިއުނިސްޓު ޕާޓީއަށް ތާއިދުކުރުމަށް މަޖުބޫރުކުރުމާއި، މުސްލިމް މަދުރަސާތަކަށް ކުދިން ފޮނުވުމަށް ފުރުސަތުނުދީ، ޗައިނާ ސަރުކާރުގެ މަދަރުސާތަކަށް ކުދިން ވެއްދުމަށް މަޖުބޫރުކުރުން ފަދަ ކަންކަމުގެ ސަބަބުން ހުރިހާ މުސްލިމުން ކޭންޕެއްގައި އުޅޭ ފަދައިން ސިފަވާކަަމަށް ރިޕޯޓުގައި ވެއެވެ.
ރިޕޯޓު ނިންމާލަމުން ފާހަގަކޮށްފައި ވާގޮތުގައި މިހުރިހާކަމެއް ކުރަމުން ދިއުމުގެ ނަތީޖާއެއްގެ ގޮތުން ޗައިނާގައި މުސްލިމުން އުޅުނަސް އެގައުުގައި އިސްލާމްދީން ވަނީ އަމަލީގޮޮތުން މަނާ ދީނަކަށް ހަދާފައެވެ.
