ދިވެހިރާއްޖޭގައި ކުރިއަށްދާ ޗައިނާގެ އެކި އެކި މަޝްރޫޢުތަކާއި، އެ މަޝްރޫޢުތަކުގައި މަސައްކަތްކުރާ އެންމެހައި ފަރާތްތަކުގެ ސަލާމަތާއި ރައްކާތެރިކަން ބެލެހެއްޓުމަށް ދިވެހި ސަރުކާރުން ވަރަށް ބޮޑު އަހައްމިއްޔަތުކަމެއް ދެއްވާ ކަމަށް ފޮރިންމިނިސްޓްރީގެ ސެކްރެޓަރީ، ބައިލެޓަރަލް، އަޙުމަދު ޚަލީލް ވިދާޅުވެއްޖެއެވެ.
އޭނާ މިހެން ވިދާޅުވީ ދިވެހިރާއްޖޭގައި ހުންނަ ޗައިނާ އެމްބަސީން އިންތިޒާމުކޮށްގެން، ޗައިނާ ސަރުކާރާއި، ދިވެހި ސަރުކާރާއި، ޗައިނާގެ ކުންފުނިތައް ހިމަނައިގެން، މިއަދު ހޮޓެލްޖެންގައި ބޭއްވި 'ޓްރައިޕާޓައިޓް ކޯޕަރޭޝަން މެކޭނިޒަމް އޮން ސެކިއުރިޓީ އިޝޫޒް ފޯ ބެލްޓް އެންޑް ރޯޑް އިނީޝިއޭޓިވް' ގެ ފުރަތަމަ ބައްދަލުވުމުގައި ބައިވެރިވެ ވާހަކަ ދައްކަވަމުންނެވެ.
މި ބައްދަލުވުމުގައި ވާހަކަފުޅުދައްކަވަމުން ޚަލީލް ވިދާޅުވީ ޗައިނާއަކީ ދިވެހިރާއްޖޭގެ ތަރައްޤީގެ މުހިއްމު ބައިވެރިއެއް ކަމަށެވެ. އެހެންކަމުން، މިއަދުގެ ބައްދަލުވުމަކީ ކުރިމަގުގައި މި ދާއިރާއިން ގުޅުން ބަދަހިކުރުމަށް އެޅުނު މުހިއްމު ފިޔަވަޅެއް ކަމަށް އޭނާ ވިދާޅުވިއެވެ.
މި ބައްދަލުވުމުގައި ދިވެހި ރާއްޖޭގެ ފަރާތުން، މިނިސްޓްރީ އޮފް ފޮރިން އެފެއާޒާއި މޯލްޑިވްސް ޕޮލިސް ސާވިސް އާއި ކަމާބެހޭ އެހެން މުއައްސަސާތަކުން ބޭފުޅުން ބައިވެރިވެވަޑައިގަތެވެ. އަދި ޗައިނާގެ ފަރާތުން ބައިވެރިވެފައިވަނީ ދިވެހިރާއްޖޭގައި ހުންނަ ޗައިނާ އެމްބަސީ އާއި ދިވެހިރާއްޖޭގައި ތަފާތު މަޝްރޫޢުތައް ހިންގާ ޗައިނާގެ ކުންފުނިތަކުގެ ބޭފުޅުންނެވެ.
