ﷲ ސުބްޙާނަހޫ ވަތަޢާލާގެ ދީން (އިސްލާމްދީން) އަށް ފުރައްސާރަކޮށް، ދީނީ މިނިވަންކަމަށް ގޮވާލާ ބައެއްގެ ފަހަތުގައި ތިބެގެން ޢަދުލު އިންސާފު ޤާއިމު ނުކުރެވޭނެ ކަމަށް އައްޝައިޚް ޙަސަން މޫސާ ފިކުރީ ވިދާޅުވެއްޖެއެވެ.
އެފަދަ ބައެއްގެ ފަހަތަށްގޮސް އިސްލާމްދީން ޙިމާޔަތް ކުރެވޭނެ ވާހަކަ ނުދެއްކުމަށް ވެސް ޝައިޚް ވިދާޅުވެފައިވެއެވެ.
ޝައިޚް މިހެން ވިދާޅުވެފައިވަނީ ރޭ ޖަމްޢިއްޔަތުއްސަލަފުގެ ސްޓޫޑިއޯއިން ގެނެސްދިން ’އޮނަތިރީސް މިނިޓް‘ ޕްރޮގްރާމުގައި ވާހަކަފުޅު ދައްކަވަމުންނެވެ. ޖަމްޢިއްޔަތުއްސަލަފުގެ ނައިބުރައީސް އައްޝައިޚް ޙަސަން މޫސާ ފިކްރީ ވިދާޅުވީ އަޅުގަނޑުމެންގެ ތެރެއިން ބައެއް ފިކުރުތަކުގައި ޖެހިފައިވާ މީހުން އިސްލާމްދީނަށް ފަރުވާލެއް ނުބަހައްޓާ ކަމަށާއި އޭގެ ބަދަލުގައި އިސްލާމް ދީނަށް ފުރައްސާރަކޮށް މަލާމާތްކޮށް، ﷲ ގެ ޙައްދުތަކަށް ދެކޮޅުހަދާ ޙާލުގައި، ޢަދުލު އިންސާފު ޤާއިމު ކުރުމަށް ގޮވާލާކަމަށެވެ.
“ ﷲ ޙަރާމް ކުރައްވާފައިވާ ކަންތައްތަކަށް ހިތްވަރުދީ އެކަމަށް ގޮވާލުމާއެކު މިގޮވާލަނީ ޢަދުލުއިންސާފު ޤާއިމު ކުރުމަށް. ކިހިނެއްތޯ މިދެކަންތައް އެއްކުރާނީ؟ މިދެކަންތަކެއް އެކެއް ނުވާނެ އިނގޭތޯ ދުވަހަކުވެސް“ ޝައިޚް ވިދާޅުވި ކަމަށް ޖަމްޢިއްޔަތުއްސަލަފުގެ ވެބްސައިޓުގައި ބުނެފައިވެއެވެ.
ﷲ ސުބްޙާނަހޫ ވަތަޢާލާއަށް އީމާންވެ، އެއިލާހުގެ ޝަރީޢަތުގެ މަތީގައި ދެމިތިބެގެން ނޫނީ އަޅުގަނޑުމެންނަށް އާޚިރަތުގައި ކާމިޔާބު ނުވާނެކަމަށާއި ﷲ އަށް އުރެދުމަކީ އަޅުގަނޑުމެންނަށް ކުރިމަތިވާނެ އެންމެބޮޑު ބިރުވެރިކަން ކަމަށް ވެސް ޝައިޚް ވިދާޅުވެފައިވެއެވެ.
”މިއަދު އަޅުގަނޑުމެންގެ މި ކުޑަކުޑަ މުޖްތަމަޢުގައި ރޯމާދުވާލު އެންމެންގެ ކުރިމަތީގައި ޤަތުލުޢާއްމުތައް އެބަހިންގާ. ލަދެއްޙަޔާތެއްނެތި ބައެއް ފަރާތްތަކުން ފާޙިޝް ކަންކަން އެބަކުރޭ ޢާއްމުތަންތަނުގަ. މިފަދަ ފަރާތްތަކަށް އަޅުގަނޑުމެން ބުނެދޭން އެބަޖެހޭ ﷲ އަށް ބިރުވެތިވުމަށް. މިދުނިޔޭގައި ބޮޑެތި ޖަރީމާތައް ހިންގާފަ ސަލާމަތް ވެވިދާނެ. ޙުކުމްތަކަށް ފިލައިގެން ނުވަތަ ތަޙުޤީޤުތަކަށް އޮޅުވާލައިގެން ކުށުން ސަލާމަތް ވެވިދާނެ. ނަމަވެސް އާޚިރަތުގައި ހަމަހިލާ ސަލާމަތެއް ނުވާނެ، އާޚިރަތުގައި ޖެހޭނީ އެހުރިހާ ކަމަކާއި ކުރިމަތިލާން“ ޝައިޚް ވިދާޅުވި ކަމަށް އެ ވެބްސައިޓުގައި ބުނެފައިވެއެވެ.
މުޖްތަމަޢުގައި މިއަދު އުފެދިފައިވާ ސިޔާސީ ހަލަބޮލިކަމާ ބެހޭގޮތުން ޝައިޚް ވިދާޅުވީ މީސްތަކުން އެމީހުންގެ ލަދުޙަޔާތް ކަނޑާލާފައި މުޖްތަމަޢު ތެރެއަށް ނުކުމެ އެމީހުން ހިތުހުރި ގޮތަކަށް އުޅެން ގޮވާލި ޒަމާނެއް މިނޫނީ ނާންނަކަމަށާއި އަޅުގަނޑުމެންގެ ޒުވާނުންނަށް ގޮވާލަންވީ ބިރުފަހަނައަޅާދާން ނޫންކަމަށެވެ. އަދި އެކުދިންނަށް ނަސޭޙަތްތެރިވާންވީ އިސްލާމްދީނާއި ކައިރިއަށް އައުމަށާއި ﷲ އަށް ބިރުވެތިވުމަށްކަމަށެވެ.
