ސިންގަޕޫރުގެ ރޯޔަލް އިންސްޓިޓިއުޝަނުން، އަރުވާ އެންމެ މަތީ ޝަރަފު (އޮނަރަރީ ފެލޯ)ގެ މަގާމު، ރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން އަބްދުލްގައްޔޫމަށް ލިބިވަޑައިގެންފިއެވެ.
އޮނަރަރީ ފެލޯގެ ޝަރަފު ރައީސް މައުމޫނަށް އަރުވާފައި ވަނީ ހޮޓެލް ޖެންގައި މިއަދު މެންދުރު ފަހު ބޭއްވި، ރޯޔަލް އިންސްޓިޓިއުޝަނުގެ ހަތްވަނަ ގްލޯބަލް ކޮންފަރެންސްގައެވެ. ރާއްޖޭގެ ރައީސުލްޖުމްހޫރިއްޔާގެ މަޤާމު ތިރީސް އަހަރު ކުރެއްވި އަލްއުސްތަޛު މައުމޫނު ޢަބްދުލްޤައްޔޫމަށް މި ޝަރަފު ލިބިވަޑައިގެންނެވިއިރު މިއީ ދެކުނު އޭޝިޔާގެ ގައުމަކަށް ނިސްބަތްވާ ބޭފުޅަކަށް މި ޝަރަފު ލިބިވަޑައިގެންނެވި ފުރަތަމަ ފަހަރުއެވެ.
ރޯޔަލްއިންސްޓިޓިއުޝަނުން އަރުވާ އެންމެ ޝަރަފުވެރި އަދި އިއްޒަތްތެރި ޝަރަފު ރައީސް މައުމޫނަށް އަރުވާފައި ވަނީ ރާއްޖޭގެ ތަރައްގީއަށާއި ރައްޔިތުންގެ ކުރިއެރުމަށް އެމަނިކުފާނު ކޮށްދެއްވާފައިވާ އަދި ކޮށްދެއްވަމުން ގެންދަވާ ޚިދުމަތްތައް ފާހަގަކުރުމުގެ ގޮތުންނެވެ.
މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ އެމަނިކުފާނު ކުރެއްވި މަސައްކަތްފުޅުތަކުން ލިބިވަޑައިގެންނެވި ކާމިޔާބީތަކުގެ ހަގީގީ ހައްގުވެރިންނަކީ ދިވެހިރައްޔިތުން ކަމަށެވެ. ރާއްޖެއަކީ ތަރައްގީވެފައިވާ ރައްޔިތެއް އޮތް ގައުމެއް ކަމަށާއި، ޚިޔާލު ފާޅުކުރުމުގެ މިނިވަންކަމާއި، ވަޒީފާ އަދާކުރުމުގެ މިނިވަންކަމާއި، ޑިމޮކްރަސީ ފަދަ އަސާސީ ހައްގުތައް މުޖުތަމައުގައި އޮންނަންޖެހޭ ކަމަށް ރާއްޖޭގެ ރައްޔިތުން ގަބޫލުކުރާ ކަމަށް މައުމޫން ވިދާޅުވިއެވެ.
ޕީޕީއެމް އުފެދުނީ ރައްޔިތުންނަށް ބޭނުންވެފައިވާ ހައްގުތައް ހިމާޔަތްކޮށްދީ، އިޖްތިމާއީ ގޮތުންނާއި އިގްތިޞާދީގޮތުން ރާއްޖެ އާ އުސްމިންތަކަށް ވާސިލްކޮށްދިނުމުގެ ވިސްނުމާއެކު ކަމަށާއި، އެކަން ރައްޔިތުން ގަބޫލު ކޮށްފައިވާ ކަމަށް ވެސް މައުމޫން ވިދާޅުވިއެވެ.
ސިންގަޕޫރުގެ ރޯޔަލް އިންސްޓިޓިއުޝަނަކީ 200އަށް ވުރެ ގިނަ ބައިނަލްއަގްވާމީ ޕްރޮފެޝަނަލް އިންސްޓިޓިއުޓްތަކުގެ މައްޗަށް އެކުލެވިގެންވާ ޕްރޮފެޝަނަލް މެމްބަޝިޕް އަދި އެކްރެޑިޓިން އިންސްޓިޓިއުޓެކެވެ.
