ސިޔާސީ ހަލަބޮލިކަމުގެ ތެރެއަށް ގައުމު ދިޔުމުގެ ބަދަލުގައި ގައުމު ބިނާކުރުމަށް ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔާމީން އަބްދުލްގައްޔޫމުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހދ. ކުޅުދުށްފުށީގައި ސަރުކާރުން ތަރައްގީ ކުރައްވަމުން ގެންދަވާ އެއާޕޯޓު ބެއްލުވުމަށް މިއަދު އެސަރަހަށްދަށް ކުރެއްވި ޒިޔާރަތުގައި ވާހަކަފުޅު ދައްކަވަމުންނެވެ.
"ސިޔާސީ ހަލަބޮލިކަމުގެ ތެރެއަށް އަޅުގަނޑުމެން ދިޔުމުގެ ބަދަލުގައި ގައުމު ބިނާކުރަންވީ. މިއީ ގައުމު ބިނާ ކުރުމުގެ ވަގުތު. މި ފަހި ފުރުސަތު ނަގާލައިގެން ނުވާނެ. މިފަހި ފުރުސަތު ނަގާލާފައި އަޅުގަނޑުމެން އަނެއްކާވެސް ސިޔާސީ ހަލަބޮލިކުމުގެ ތެރެއަށް ގޮސްފިނަމަ އަޅުގަނޑުމެންގެ ގައުމުން ގެއްލިގެން އެދިޔައީ ވަރަށް އަގުހުރި ރަނުގެ ފުރުސަތެއް،" ޑރ. ޝަހީމް ވިދާޅުވިއެވެ.
އެމަނިކުފާނު ވިދާޅުވީ އެހެންކަމުން ރައްޔިތުންނާއި ހުރިހާ ސިޔާސީ ޕާޓީތައް ނުކުމެ ރައީސް ޔާމީނަށް ވޯޓު ދެއްވައި ރިޔާސީ ދެވަނަ ދައުރަކަށް އެމަނިކުފާނު އިންތިޚާބު ކުރަން ޖެހޭ ކަމަށެވެ.
ކުޅުދުށްފުށީގައި ސަރުކާރުން ހިންގާ އެއާޕޯޓު މަޝްރޫއަކީ ޝުކުރު ހައްގު މަސައްކަތެއް ކަމަށާއި އެއީ ކުޅުދުއްފުށީ ރައްޔިތުންނަށް ސަރުކާރުން ކޮށްދެއްވާ ވަރަށް ބޮޑުކަމެއް ކަމަށް ޝަހީމް ވިދާޅުވިއެވެ.
ރިޔާސީ އިންތިޚާބުގެ ކުރިން އެ އެއާޕޯޓަށް ޓެސްޓް ފުލައިޓް ޖެއްސުމަށް މަސައްކަތް ކުރައްވަމުން ގެންދަވާ ކަމަށް ރައީސް ޔާމީން ވިދާޅުވެފައިވާ ކަމަށް ވެސް ޑރ. ޝަހީމް ވިދާޅުވިއެވެ. އެއީ ކުޅުދުއްފުށީ ޒުވާނުންނާއި ރައްޔިތުންނަށް މުސްތަގުބަލަށް ގާއިމްކުރެވޭ މުހިންމު މަޝްރޫއެއް ކަމަށާއި، މާލޭއިން ފުރައިގެން ސީދާ ރަށަށް އައުމަކީ ވަރަށްމަދު ރަށަކަށްނޫނީ ނުވާކަމެއް ކަމަށް ވެސް ޑރ. ޝަހީމް ވިދާޅުވިއެވެ.
މި މަޝްރޫއަށް ކުޅުދުއްފުށީ ރައްޔިތުން ކުރައްވާ އުންމީދު ވަރަށް ބޮޑު ކަމަށާއި ރައީސް އަބަދުވެސް މަސައްކަތް ކުރައްވަމުން ގެންވަނީ ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ލޮބުވެތި ރައްޔިތުންނަށް ފަސޭހަ ތަނަވަސް ފުރުސަތު ހޯއްދަވައި ދެއްވަން ކަމަށް ޑރ. ޝަހީމް ވިދާޅުވިއެވެ.
ރައީސް ޔާމީނަށް ރިޔާސީ ދެއްވަނަ ދައުރެއް ރައްޔިތުން ދެއްވައިފި ކަމަށްވާނަމަ މިފަދަ ކިތަންމެ މަޝްރޫއެއް ރައްޔިތުންނަށްޓަކައި ގާއިމް ވެގެންދާނެ ކަމަށް ވެސް ޝަހީމް ވިދާޅުވިއެވެ.
