ދެހާސް ތޭރަވަނަ އަހަރުގެ ރިޔާސީ އިންތިޚާބުގައި ރައްޔިތުން އެމަނިކުފާނަށް ފުރުސަތު ދެއްވީ އެމަނިކުފާނަކީ އެއްގޮތަކަށް ވެސް ކިހާވަރެއްގެ ބޭފުޅެއްކަން ނޭނގިތިބެ ކަމަށް ރައީސް ޢަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރ. މީދުއަށް ވަޑައިގެން އެރަށު މީހުންނާ މިއަދު ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ އޭރު ގިނަމީހުންނަށް އެނގިފައިވަނީ އެމަނިކުފާނަކީ ރައީސް މައުމޫނުގެ މަދަރުސާއިން ދަރިވަރުވި ބޭފުޅެއް ކަމަށާއި، ސަރުކާރުގެ ގިނަމަގާމްތަކެއް ފުރުއްވި ބޭފުޅެއް ކަމަށާއި ސަރުކާރުގެ ކުންފުނިތަކަށް ބޮޑެތި ބަދަލު ގެންނަވާ ބޭފުޅެއްގެ ގޮތުގައި ކަމަށެވެ.
"އަޅުގަނޑު ދެހާސް ތޭރަ ވަނަ އަހަރު ނުކުތްއިރު ރައްޔިތުންނަށް އެނގިވަޑައެއް ނުގަންނަވާނެ އަޅުގަނޑުމީ ކިހާވަރަކަށް މަސައްކަތް ކޮށްފާނެ މީހެއްކަމެއް. އެކަމަކު އޭރުވެސް އެނގިވަޑައިގަންނަވާނެ ރައީސް މައުމޫނުގެ ސްކޫލުން ދަރިވަރުވި މީހެއްކަން ޔާމީނަކީ. އޭރު އަޅުގަނޑު މަސައްކުރާ ސްޕީޑެއް އަޅުގަނޑު މަސައްކަތްކުރަނީ ކިހިނެއްތޯއާއި ކަންކަންކަމުގެ ވައްޓަފާޅިހުރިކަމެއް ނޭނގޭނެ،" ރައީސް ވިދާޅުވިއެވެ. އެހެންނަމަވެސް އެމަނިކުފާނު ރިޔާސީ އިންތިޚާބަށް ނުކުންނެވުމުން އޭރު ރައްޖޭގައި އޮތް "ޖައްބާރު އަނިޔާވެރި ވެރިކަން ނިމުމަކަށް ގެނައުމަށް އެންމެން ނިކުމެ ވާހަކަ ދެއްކުމުން އެހެންމީހަކަށް ފުރުސަތު ދެއްވަން ޖެހުއްޖެ ކަމަށް ރައްޔިތުން ގަބޫލު ކުރެއްވި ކަމަށް ރައީސް ވިދާޅުވިއެވެ.
ރައްޔިތުންނަށް ޚިދުމަތް ކުރެއްވުމަށް ރައްޔިތުން ދެއްވި ފުރުސަތަކަށްޓަކައި ޝުކުރު ދަންނަވާ ކަމަށާއި އެފުރުސަތު އިޚުތިޔާރު ކުރެއްވީ އެއްގޮތަކަށް ވެސް އެމަނިކުފާނުގެ އަމިއްލަ ތަނަވަސްކަން އިތުރު ކުރެއްވުމަށް ނޫންކަމަށް ވެސް ވިދާޅުވިއެވެ.
ރައީސް ވިދާޅުވީ ސެޕްޓެމްބަރ 23 ގައި ބާއްވާ އިންތިޚާބުގައި ދޭ ވޯޓަކީ ގައުމުގެ ހަމަތަކާއި އިސްލާމްދީނަށްޓަކައި ދޭ ވޯޓެއްގެ ގޮތުގައި އިޚްތިޔާރު ކުރުމަށެވެ. އިދިކޮޅުގައި ތިބީ މާޔޫސްވެފައިވާ ލީޑަރުން ކަމަށާއި ތަރައްގީއަށް ލޯނެއް ނަގަން ވެސް އެބޭފުޅުންނަށް ކެރިވަޑައި ނުގަންނަވާ ކަމަށް އެމަނިކުފާނު ވިދޅުވިއެވެ. އެހެންނަނަމަވެސް އެމަނިކުފާނު ނަރުދަމާފަދަ ޚިދުމަތް ފޯރުކޮށްދޭން ފަށައިފައިވާ ތަންތަނަށް ގޮސް އެރަށެއްގައި ނަރުދަމާ އަޅުއްވައި ދެއްވާނެ ކަމަށް އެފަދަ ލީޑަރުން ވިދާޅުވަމުން ގެންދަވާ ކަމަށް ވެސް ރައީސް ވިދާޅުވިއެވެ. އެފަދަ ލީޑަރުން ބިންހިއްކަން ވެސް ބޭނުންވާ ކަމަށާއި އެކަމަކު އެކަމަށް ވެސް ލޯނެއް ނަގަން ކެރިވަޑައި ނުގްނަނަވާ ކަމަށް އެމަނިކުފާނު ވިދާޅުވިއެވެ.
