ކުރިއަށްއޮތް ރިޔާސީ ފަސްއަހަރުގައި ސަރުކާރު ކުންފުނިތަކުގެ ބޯޑު މެންބަރުންގެ ތެރެއިން އަންހެނުންގެ އަދަދު 50 އިންސައްތައަށް އިތުރު ކުރައްވާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރ. ހުޅުދުއްފާރަށް މިއަދު ވަޑައިގެން ދެއްކެވި ވާހަކަފުޅުގައެވެ. ރައީސް ވިދާޅުވީ މިހާރުވެސް ކުންފުނިތަކުގެ ބޯޑުގެ 20 އިންސައްތަ މެންބަރުންނަކީ އަންހެނުން ކަމަށެވެ. "މިއަދު އަޅުގަނޑު އިއުލާން މިކުރަނީ ދެންއަންނަ ފަސްއަހަރެއް ނިމިގެންދާއިރު އަޅުގަނޑުމެންގެ ކުންފުނިތަކުގެ ބޯޑުގެ މިއަދަދު އިރާދަ ކުރެއްވިއްޔާ ފަންސާސް ޕަސެންޓަކީ އަންހެން ބޭފުޅުން ކަމަށް އަޅުގަނޑު ކަށަވަރު ކުރާނަން،" ރައީސް ވިދާޅުވިއެވެ.
އެމަނިކުފާނު ވިދާޅުވީ އަންހެނުންނަކީވެސް ވިޔަފާރީގައި މަސައްކަތް ކުރެވޭނެ ގާބިލް ބައެއް ކަމަށާއި އެބޭފުޅުންގެ އިލްމާއި ހުނަރު އެކަމުގައި ބޭނުން ކުރެވޭނެ ކަމަށެވެ. އަދި އެ ބޭފުޅުންނަކީ މިސަރުކާރުގައި ހަވާސާ ކުރެވިފައިވާ ބަޔަކަށް ނުވާނެ ކަމަށް ވެސް ވިދާޅުވިއެވެ.
އެމަނިކުފާނު ވިދާޅުވީ ނިމިގެން މިދާ ފަސް އަހަރުގައި މިސަރުކާރުންވަނީ ރަށްރަށަށް ތަރައްގީގެ އެތައް ކަމެއް ކޮށްދެއްވައިފައި ކަމަށެވެ. އެހެން ކަމުން ތަރައްގީގެ އިތުރު ޕްރޮގްރާމް އެމަނިކުފާނަށް ކުރިއަށް ގެންދެވޭނީ ރައްޔިތުން އެމަނިކުފާނަށް ދެވަނަ ދައުރެއް ދެއްވައިގެން ކަމަށެވެ. އެހެން ކަމުން ސެޕްޓެމްބަރ 23 ގައި ނަގާ ވޯޓުގައި އެމަނިކުފާނަށް ވޯޓު ދެއްވުމަށް އެދިވަޑައިގެންނެވިއެވެ.
