ރައީސް ނަޝީދުގެ ބޯކަނޑަން ޕީޕީއެމްގެ އެކްޓިވިސްޓަކު ބުނުމުން އެމައްސަލަ ތަހުގީގުކޮށް ފިޔަވަޅު އަޅައިދިނުމަށް އެދި އެމްޑީޕީގެ ފަރާތުން ފުލުހަށް ހުށަހަޅައިފިއެވެ.
އެމްޑީގެ ސެކްރެޓަރީޖެނެރަލް އަނަސް އަބްދުއްސައްތާރު ވިދާޅުވީ އެމްޑީޕީން އެ މައްސަލަ ފުލުހަށް ހުށަހެޅީ މިއަދު ކަމަށެވެ. ޕީޕީއެމްގެ އަންހެން އެކްޓިވިސްޓަކު އެހެން ބުނެފައިވަނީ ހުޅުމާލޭގައި ހޮނިހިރުދުވަހު ހަވީރު ބޭއްވި ރިޔާސީ ކެމްޕޭން ހަރަކާތެއްގައި އަޑުގަދަ ކުރާ މެދުވެރިކޮށެވެ.
އެމްޑީޕީން ބުނެފައިވަނީ އެ ޕާޓީގެ ރައީސް މުޙައްމަދު ނަޝީދުގެ ކަރު ބުރިކޮށްލަން ގޮވާލި ގޮވާލުން އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އެގޮތަށް ގޮވާލުމަކީ ސާބިތު ހެކިލިބިފައިވާ ސީރިއަސް ޖިނާއީ ކުށެއް ކަމަށް ވެސް އެޕާޓީން ބުނެފައިވެއެވެ. އެހެންކަމުން އެކަން ތަހުގީގުކޮށް އެކަން ކުރި ފަރާތާމެދު ގާނޫނީ ފިޔަވަޅު އެޅުމަށް އެޕާޓީން ވަނީ ކަމާބެހޭ ފަރާތްތަކަށް ގޮވާލައިފައެވެ.
"މިފަހަކަށް އައިސް ޢަބްދުﷲ ޔާމީންގެ ކެމްޕޭން ޙަރަކާތްތައް ހައްދުންނެއްޓި، އަނިޔާވެރިކަން އިސްކޮށް، ސުލްހަވެރިކަން ނަގާލުމަށް ގޮވާލަމުން އަންނައައުމަކީ ކަނޑައެޅިގެން ކެމްޕޭން ކުރުމުގެ މިންގަނޑުތަކާ އަދި ޤަނޫނުތަކާ ޚިލާފަށް ކުރަމުން އަންނަ ނުރައްކާތެރިކަން ބޮޑު" ކަމެއް ކަމަށް އެމްޑީޕީން ވަނީ ބުނެފައެވެ.
"ސިޔާސީ ޕޯޑިއަމްތަކުގައާއި، ކެމްޕޭން ޙަރަކާތްތަކުގައި އެއްވެސް ވިސްނުމެއް ފިކުރެއްނެތި، ފާޅުކަން ބޮޑުކޮށް ދިވެހި އެއްވެސް ފަރުދެއްގެ ބޯ ބުރިކޮށް، މަރާލުމަށް ގޮވާލުންފަދާ ޖާގަ ދެވިގެން ނުވާނެ" ކަމަށް ވެސް އެމްޑީޕިން ބުނެފައިވެއެވެ.
