ކުރިޔަށް އޮތް ރިޔާސީ އިންތިޚާބުގެ ނަތީޖާ އަވައްޓެރި އިންޑިޔާއަށް ގަބޫލު ނުކުރެވުނަސް އިންޑިޔާ ސިފައިން ރާއްޖެ އަރައިގެން ނުވާނެ ކަމަށް ރައްޔިތުންގެ މަޖިލީހުގެ ހިތަދޫ މެދުދާއިރާގެ މެމްބަރު އަދި ކުރިން ދިވެހި އަސްކަރިއްޔާގެ އިސްމަގާމެއް އަދާކުރައްވާފައިވާ އިބްރާހިމް ދީދީ މިއަދު ވިދާޅުވެއްޖެއެވެ.
ރިޔާސީ އިންތިޚާބުގެ ވޯޓުގައި ސަރުކާރުން މަކަރުހަދައި، އޮޅުވާލައިފިނަމަ އިންޑިޔާ ސިފައިން ރާއްޖެ އަރައި ރާއްޖެ ހިފަން އިންޑިޔާގެ ގާނޫނުހަދާ މަޖިލީހުގެ މެމްބަރެއް ކަމަށްވާ ސުބަރުމާނިއަން ގޮވާލާފައިވާތީ އެކަމަށް ރައްދު ދެއްވައި އިދިކޮޅު އެމްޑީޕީއަށް ނިސްބަތްވެވަޑައިގަންނަވާ އިބްރާހިމް ދީދީ ވިދާޅުވީ އަވައްޓެރި ގައުމެއްގައި ބާއްވާ އިންތިޚާބުގެ ނަތީޖާ ގަބޫލު ނުކުރުމުގެ ހައްގު އިންޑިޔާއަށް ލިބިގެންވާ ކަމަށެވެ.
އެގޮތުން ސެޕްޓެމްބަރު 23 ވަނަ ދުވަހު ރާއްޖޭގައި އޮންނަ އިންތިޚާބުގެ ނަތީޖާ އިންޑިޔާއަށް ގަބޫލު ނުކުރެވުނަސް އިންޑިޔާ ސިފައިން އަރައިގަނެގެން ނުވާނެ ކަމަށެވެ. އަދި އެފަދަ ޙާލަތެއްވެސް ނާންނާނެ ކަމަށް އޭނާ ވިދާޅުވިއެވެ. އިބްރާހިމް ދީދީ ވިދާޅުވީ އިންޑިޔާ ސިފައިން ރާއްޖެ އަރައި، ރާއްޖެ ހިފުމަކީ މުޅި ނިޒާމާވެސް ޚިލާފު ކަމެއް ކަމަށާއި އެކަން ކޮށްގެން ނުވާނެ ކަމަށެވެ.
އިބްރާހިމް ދީދީ ވިދާޅުވީ އިންތިޚާބުގައި ސަރުކާރަށް މަކަރުވެސް ނުހެދޭނެ ކަމަށާއި މިނިވަން އިންސާފުވެރި އިންތިޚާބެއް ބޭއްވުމަކީ ގާނޫނު އަސާސީންވެސް މަޖުބޫރު ކޮށްފައިވާ ކަމެއް ކަމަށާއި އިންތިޚާބުގައި މަކަރު ހެދުމަކީ ގާނޫނީ ކުށެއް ކަމަށެވެ.
