އިދިކޮޅު ރިޔާސީ ކެންޑިޑޭޓު އިބްރާހީމް މުހައްމަދު ސާލިހު (އިބޫ) ރ. އަތޮޅަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި ވަޑައިގަންނަވާ ރަށްރަށުން ވަރަށްބޮޑު ތަރުހީބެއް އެމަނިކުފާނަށް ދެއްވަމުން ގެންދަވާ ކަމަށް އެމްޑީޕީން ބުނެފިއެވެ.
އެމަނިކުފާނު މިހާރު ވަޑައިގެން އުޅުއްވަނީ ރ. ވާދޫގައެވެ. އެރަށަށް ވަޑައިގެންނެވުމުން ވެސް ވަރަށް ހޫނު މަރުހަބާއެއް ވަނީ ކިޔައިފައެވެ. މިދަތުރުފުޅުގައި އެމަނިކުފާނުގެ އަރިހުގައި ރައްޔިތުންގެ މަޖިލީހުގެ ބައެއް މެމްބަރުންނާއި ގުޅިފައިވާ ޕާޓީތަކުގެ އިސް ބައެއް ބޭފުޅުން ބައިވެރިވެ ވަޑައިހަންނަވައެވެ.
މިދަތުރުފުޅުގައި އެމަނިކުފާނު ވަނީ ރ. ރަސްގެތީމަށް ވެސް ވަޑައިގެންފައެވެ. އެރަށުގައި އެމަނިކުފާނު ވިދާޅުވީ ރާއްޖޭގެ ތަރައްގީ މަޑުޖެހިފައިވާ ކަމަށެވެ. އެގޮތަށް އެކަންވީ ސަރުކާރުގެ ޚިޔާނާތާއި ވައްކަމުގެ ސަބަބުން ކަމަށެވެ. ސަރުކާރުންވަނީ ރައްޔިތުންނަށް އެންގެވުމެނެތި ރާއްޖޭގެ އެތައް ފަޅުރަށެއް ނުއަގުގައި ވިއްކައިފައި ކަމަށް ވެސް ވިދާޅުވިއެވެ.
އެމަނިކުފާނުވަނީ އަނގޮޅިތީމަށް ވެސް ވަޑައިގެން ފައެވެ. ވާދުއަށްފަހު ދެން ވަޑައިގަންނަވާނީ އަލިފުށްޓަށެވެ.
މިދަތުރުފުޅުގައި މާދަމާ ދުވާފަރާއި، އުނގޫފާރަށް ވެސް ވަޑައިގަންނަވާނެއެވެ. "އެމަނިކުފާނު ވަޑައިގަންނަވާ ކޮންމެ ރަށުން ބޮޑު ތަރުހީބަކާއި ތާއީދެއް އެމަނިކުފާނަށް ލިބިވަޑައިގަންނަވާ" އިބޫގެ އަރިހުގައި ދަތުރުކުރައްވަމުން ގެންދަވާ އިސްބޭފުޅަކު ވިދާޅުވިއެވެ.
