އިސްލާމިކް ސްޓޭޓް (އައިއެސް) ޖަމާއަތުގެ ވެރިޔާ އަބޫބަކްރު އަލްބަޣުދާދީގެ އަޑެއް ނީވޭތާ އެއް އަހަރު ފަހުން އޭނާއަށް ނިސްބަތްކުރެވިފައިވާ އޯޑިއޯ ޚިޠާބެއް އާއްމުކޮށްފިއެވެ. އޭގައި އޭނާއަށް ތަބާވާ މީހުންނަށް ސާބިތުކަން މަތީ ތިބުމަށާއި، ދުޝްމަނުންނާ ކުރާ ހަނގުރާމަ ހުއްޓާނުލުމަށް ގޮވާލާފައި ވެއެެވެ.
'ކެތްތެރިންނަށް އުފާވެރިކަމުގެ ޚަބަރުދޭށެވެ.' މިނަމުގައި ބުދަ ދުވަހު އިސްލާމިކް ސްޓޭޓްގެ އަލްފުރްޤާން މީޑިއާ ފައުންޑޭޝަނުން އާއްމުކުރި 54 މިނިޓުގެ ރިކޯޑުކުރެވިފައިވާ މެސެޖުގައި އޭނާ ބުނެފައި ވަނީ "މުޖާހިދުންގެ ގާތުގައި ނަސްރުލިބުމާއި ބަލިވުމުގެ މިންގަނޑަކީ އެމީހުން އަތުން ފޭރިގަނެވުނު ރަށަކާއި ނުވަތަ އަވަށަކާއި ގުޅިފައިވާ ކަމެއް ނޫނެވެ. ނުވަތަ އަޅުންނަށް ލިބިފައިވާ ވައިގެ ބާރާއި، ބައްރުތައް ހުރަސްކޮށް ދަތުރުކުރާ މިސައިލްތަކެއް ނޫނެވެ."
އަލްބަޣުދާދީ ދިރިހުރިތޯއާއި، އޭނާ ދިރިހުރިނަމަ އުޅެނީ ކޮންތާކުތޯ މިސުވާލުތަކަށް އެކަށޭނަ ޖަވާބެއް ވަނީ ނުހޯދިފައެވެ. ޖޫން 2014 ގައި އިރާގާއި ސީރިޔާގައި ޚިލާފަތެެއް އިއުލާންކުރި އިރު އެޖަމާއަތުން އެ ދެގައުމުގައި ކޮންޓުރޯލުކުރި ބިމުގެ %90 މިހާރު ވަނީ އެޖަމާއަތުގެ އަތުން ބީވެގެން ގޮސްފައެވެ.
އައިއެސްގެ ވެރިޔާގެ އަޑު އެންމެ ފަހުން އިވިފައި ވަނީ 28 ސެޕްޓެންބަރު 2017 ގައެވެ. އެފަހަރު އޭނާއަށް ތަބާވާ މީހުންނަށް އޭނާ ގޮވާލީ ފެނުނު ކޮންމެ ތާކުން ދުޝްމަނުން އަންދާލުމަށެވެ.
މިފަހަރުގެ ޚިޠާބުގައި އޭނާ ވަނީ އެމެރިކާއާއި ރަޝިޔާއަށް ބަހުގެ ވަރުގަދަ ހަމަލާތަކެއްދީ އިންޒާރުދީފައެވެ. "ސަރަހައްދުގައި އެމެެރިކާ ދެކެމުން އައި ހުވަފެންތައް މާތް ﷲގެ ތައުފީޤާއި އެކަލާނގެ ނިޢުމަތުން މުޖާހިދުން ނުކުމެ ނާކާމިޔާބުކޮށްލުމާއެކު، ސަލީބީ ރަޝިޔާ ނުކުމެ އެމީހުންނާ ވާދަކުރަން ފެށިއެވެ." އޭނާ ބުނެފައިވެއެވެ.
"ސަލީބު ހިމާޔަތްކުރާ އަދި އަހުލުއްސުންނާގެ މީހުން ގަތުލުކުރާ މީހުންނޭވެ! އިސްލާމިކް ސްޓޭޓުގައި އަހަރުމެން ވަނީ ކަލޭމެންނަށް އިރާގާއި ޚުރާސާންގެ މުސީބާތްތައް ހަނދާން ނައްތާލާނޭ ކަމެެއް ތައްޔާރުކޮށްފައެވެ." އެމެރިކާއާއި ރަޝިޔާއަށް އިންޒާރުދެމުން އޭނާ ބުނެފައި ވެއެވެ.
އަލްބަޣުދާދީ އާއްމުކޮށް ފެނިފައި ވަނީ އެންމެ ފަހަރަކު އެވެ. އެއީ 2104 ވަނަ އަަހަރު އިރާގު މޫސަލްގައެވެ. މިފަހަރު މި އޯޑިއޯ އާއްމުކުރި އިރު، މީގެ ދުވަސްކޮޅެއް އަލްބަޣުދާދީގެ ދަރިފުޅު ހުޒައިފާ އަލްބަދްރީ ސީރިޔާގައި ރަޝިޔާއިން ދިން މިސައިލް ހަމަލާއެއްގައި މަރުވެފައިވާ ކަމަށް އިރާގުގެ ޖާސޫސީ އިދާރާއިން ވަނީ ބުނެފައެވެ.
އިރާގުގެ ބައެެއް މަސްއޫލުވެރިން ކަށަވަރުކޮށްދޭ ގޮތުގައި އަލްބަޣުދާދީ ދިރި އެބަހުއްޓެވެ. އޭނާ އުޅެނީ ސިރިޔާއާއި އިރާގުގެ ސަރަހައްދީގެ ރޮނގުގައި ސީރިޔާގެ ތެރޭގައެވެ.
