އިންޑިޔާގައި އެންމެގިނަ ދިވެހިން ދިރިއުޅެމުން އަންނަ ޓްރިވެންޑްރަމް ހިމެނޭ ކެރެލާ ސްޓޭޓުގައި ފެންބޮޑުވެ އެ ސަރަހައްދަށް ލިބެމުން އަންނަ ގެއްލުންތަކާއި ގުޅިގެން ރާއްޖެއިން އިންޑިޔާއަށް 50،000 ޑޮލަރުގެ އެހީއެއް ދިނުމަށް ދިވެހި ސަރުކާރުން ނިންމައިފިއެވެ.
ރައީސުލްޖުމްހޫރިއްޔާގެ އޮފީހުން ބުނީ ރާއްޖެއިން އިންޑިޔާއަށް ދޭ 50،000 ޑޮލަރުގެ އެހީއަކީ ކެރެލާ ސްޓޭޓަށް ލިބުނު ގެއްލުންތަކުން އަރައިގަތުމަށް ވެދޭ އެހީއެއް ކަމަށެވެ. ރާއްޖެއިން އިންޑިޔާއަށް އެހީވުމަށް ނިންމިއިރު އިންޑިޔާއަކީވެސް ރާއްޖެއަށް ކުރިމަތިވާ ޙާދިސާ ތަކުގައި ވަރަށްގިނައިން އެހީވަމުން އަންނަ ގައުމެކެވެ.
ކެރެލާއަށް ކުރަމުން އަންނަ ވިއްސާރައިގައި ފެންބޮޑުވުމުގެ ސަބަބުން ގިނަ އަދަދެއްގެ ބަޔަކު މިހާތަނަށް ވަނީ މަރުވެފައެވެ. މީޑިޔާ ރިޕޯޓުތައް ބުނާ ގޮތުގައި މިހާތަނަށް މި ޙާދިސާގައި 200 ވަރަކަށް މީހުން ވަނީ މަރުވެފައެވެ. އަދި އެތައް ބަޔަކު ގެދޮރު ގެއްލި ޙާލުގައި ޖެހިފައި އަދިވެސް އެބަތިއްބެވެ.
ފެންބޮޑުވުމުގެ ސަބަބުން ދިވެހިން ގިނަ އަދަދަކަށް ދިރިއުޅޭ ޓްރިވެންޑްރަމް އާއި ކޮޗިންގގައި ދިރިއުޅޭ ބަޔެއް ދިވެހިންނަށް އަސަރު ކޮށްފައިވެއެވެ. ނަމަވެސް ދިވެހި ސަރުކާރުން މިހާރު ވަނީ އެ ހުރިހާ ދިވެހިން ރައްކާތެރި ހިސާބަކަށް ބަދަލުކޮށްފައެވެ.
