ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަބްދުﷲ ރިޔާޒު ހިންގަވާ "ރިޔާޒު ފައުންޑޭޝަން" ގެ ފަރާތުން ކޮންމެ އަހަރަކު ހައްޖަށް ފޮނުވަމުން ގެންދަވާ ބޭފުޅުންގެ ތެރެއިން މިއަހަރު ފޮނުވާ ބޭފުޅާ އިއްޔެ ފުރައިފިއެވެ.
ރިޔާޒު ފައުންޑޭޝަނުން މައުލޫމާތު ދެއްވި ގޮތުގައި އެ ފައުންޑޭޝަނުން މިއަހަރު ހައްޖަށް ފޮނުވާފައިވަނީ ހިރިލަންދޫ އަބްދުއްޝުކޫރެވެ. "މިއީ އެމްޕީ ރިޔާޒުގެ އިސް ނެންގެވުމަށް ހައްޖަށް ފޮނުވާ ހަތަރުވަނަ ބޭފުޅާ،" ރިޔާޒު ފައުންޑޭޝަނުން ވިދާޅުވިއެވެ.އެ ފައުންޑޭޝަނުން ވަނީ އަބްދުއްޝުކޫރަށް މަބުރޫރު ހައްޖަކަށް އެދޭ ކަމަށް ވިދާޅުވެފައެވެ.
ރިޔާޒު ފައުންޑޭޝަނަކީ އިލްމީ، ހަރުދަނާ ޖީލެއް ބިނާ ކުރުމަށް އެކިދާއިރާތަކުން މީހުންނަށް އެހީތެރިވުމާއި ކުޅިވަރު ދިރުވައި އާލާ ކުރުމަށް ހިންގާ ފައުންޑޭޝަނެކެވެ. އެފައުންޑޭޝަނުން ގެންދަވަނީ ކޮންމެ އަހަރަކު ދާއިރާގެ ރަށެއްގައި ފުޓުބޯޅަ މުބާރާތެއް ވެސް ބާއްވަމުންނެވެ.
