އައްޑޫސިޓީ ހުޅުދޫ ސްކޫލުގެ މިއަހަރުގެ "ބެލެނިވެރިންގެ ހަފްތާ" ކާމިޔާބު ކަމާއެކު ނިންމާލައިފިއެވެ.
މިހަފްތާ ބާއްވައިފައިވަނީ މިމަހުގެ 11 އިން 17 އަށެވެ. މިހަފްތާގައި ވަނީ ބެލެނިވެރިންގެ މެދުގައި ތަފާތު މުބާރާތްތައް ބާއްވައިފައެވެ. މިހަރަކާތް ކުރިއަށް ގެންދިޔައީ "ބެލެނިވެރިންގެ ގުޅުން ދަރިވަރުންގެ ކުރިއެރުން" ގެ ނަމުގައެވެ.
ހުޅުދޫ ސްކޫލުން ވިދާޅުވީ މިހަފްތާގައިވަނީ މިނިޓޯނަމެންޓް ތަކެއް ބާއްވައިފައި ކަމަށެވެ. "އޭގެތެރޭގައި އަންހެނުންނާއި ފިރިހެނުންނަށް ފުޓުސަލްއާއި، ސްވިމިންއާއި، ފިރިހެނުންނަށް ޚާއްސަކޮށްގެން ނެޓްބޯޅައާއި، މަސްވެރިކަމާއި، ހޭލުންތެރި ކުރުވުގެ ޕްރޮގްރާމްތައް ހިމެނޭ،" އެ ސްކޫލުން ވިދާޅުވިއެވެ.
ބެލެނިވެރިންގެ ހަފްތާގެ މަގުސަދަކީ ބެލެނިވެރިންނާއި ސްކޫލް ނުވަތަ ޓީޗަރުންނާ އޮންނަ ގުޅުން މިހާރަށްވުރެ ވެސް ވަރުގަދަކޮށް ރަނގަޅު ކުރުމެވެ.
ބެލެނިވެރިން އަބަދުވެސް ވަގުތު ހޭދަކުރަނީ ދަރިވަރުންނަށްޓަކައި ކަމަށާއި އެހެން ކަމުން އެމީހުގެ ސްޓްރެސް ފިލުވައިލުމަކީ ވެސް މި ހަފްތާ ފާހަގަ ކުރުމުގެ އެއް މަގުސަދު ކަމަށް ހުޅުދޫ ސްކޫލުން ވިދާޅުވިއެވެ.
ބެލެނިވެރިންގެ ހަފްތާގައ ބޭއްވި ތަފާތު މުބާރާތްތަކުން ވަނަ ހޯދި ފަރާތްތަކަށްވެސް ވަނީ އިނާމާއި ތަށި ދީފައެވެ. އިނާމާއި ތަށި ދެއްވީ ހެޔޮއެދޭ ފަރާތްތަކުނެވެ. އޭގެ ތެރޭގައި ސަރުކާރުގެ ބައެއް ކުންފުނިތަކާއި އަމިއްލަ ކުންފުނިތަކާއި ބައެއް މަސްދޯނިފަހަރުވެސް ހިމެނެއެވެ. އެ ސްކޫލުންނާއި ބެލެނިވެރިން ވަނީ އެހުރިހާ ފަރާތްތަކަށް ޝުކުރު އަދާކުރައްވައިފައެވެ.
