ފަލަސްޠީނުގެ އިސްލާމިކް ރެސިސްޓެންސް މޫވްމަންޓް (ޙަމާސް) އާއެކު 6 ކަމެއް އެކުލެވޭ ސުލްހައަކަށް އެއްބަސްވުމަށް އިސްރާއީލުގެ ވަޒީރުންގެ މަޖިލީހުގެ ކުޑަ ކޮމިޓީއަކުން ނިންމައިފި ކަމަށް އިސްރާއީލުގެ ނޫހަކުން ބުނެފިއެވެ. އެ ޚަބަރު ބުނާ ގޮތުން އެ 6 ކަންތައް ތަންފީޒު ކުރެވޭނީ އެއް ކަމަކަށް ފަހު އަނެއް ކަމެއް ތަންފީޒުުކުރާ ގޮތަށް، ކަނޑައެޅޭ ވަކި މުއްދަތެއްގެ ތެރޭގައެވެ.
ހާާއާޓްސް ނޫހުގެ އޮންލައިން އެޑިޝަނުގައި ބުނެފައިވާ ގޮތުގައި އެ އެއްބަސްުވުން ގާއިމުކުރެވުނީ މިސުރުގެ ބެލުމުގެ ދަށުން، މެދު އިރުމަތީގެ ސުލްހައިގެ މަސައްކަތަށް އދ.ން ކަނޑައަޅާފައި ހުންނަވާ މަންދޫބު ނިކޮލާއި މަލާޑިނޯފްގެ އެހީތެރިކަމާ އެކުގައެވެ.
ފާއިތުވި ބުދަދުވަހު ޣައްޒާއަށް ބުދާ އެތެރެކުރުމަށް ބޭނުންކުރާ ކަރަމް އަބޫ ސާލިމް ކްރޮސިންގ ހުޅުވުމަކީ މި އެއްބަސްވުމުން ތަންފީޒުކުރެވުނު ފުރަތަމަ ބައެވެ. ދެން އެބައިގައި ހިމެނީ ޣައްޒާގެ މީހުން މަސްވެރިކަން ކުރަން ހުއްދަ ދީފައިވާ ސަރަހައްދު އިތުރަށް ފުޅާކުރުމެވެ.
ނަން ހާމަކުރަން ނޭދޭ ޔަހޫދީ ތިން މަސްއޫލުވެރިއަކާ ހަވާލާދީ އެ ނޫހުން ބުނެފައިވާ ގޮތުގައި އެއްބަސްވެވުނު 6 ކަމުގެ ތެރެއިން ފުރަތަމަ ކަމަކީ ހަމަލާތައް ބަދަލުކުރުން މުޅިން ހުއްޓާލުމެވެ. ދެވަނަ ކަމަކީ ޣައްޒާއަށް މުދާ އެތެރެކުރާ މަގު ހުޅުވާލައި، މަސްވަރިކަން ކުރަން ހުއްދަދީފައިވާ ސަރަަހައްދު އިތުުރަށް ފުޅާކުރުމެވެ. މި ދެކަންތައް މިހާރު ވަނީ ތަންފީޒު ކުރެވިފައެވެ. ސުލްހަ ދެމެހެއްޓޭނަމަ ދެން ހުރި ކަންތައްވެސް މަޑުމަޑުން ތަންފީޒުކުރެވެމުން ދާނެއެވެ.
އެއްބަސްވުމުގައި ދެން ހުރި ކަންކަމަކީ ބޭހާއި އިންސާނީ އެހީ ޣައްޒާއަށް އެތެރެކުރުމާއި، ހަނގުރާމައިގެ އަސީރުންނާއި، ޣައްޒާގައި ގެއްލިފައިވާ އިސްރާއީލު މީހުންގެ މައްސަލަ ހައްލުކުރާނެ ގޮތެއް ހަމަޖެއްސުމާއި، ބޭރުގެ ފަރާތްތަކުގެ އެހީއާއެކު ޣައްޒާގެ ވަތުއޮނިގަނޑު ރަނގަޅުކުރުމާއި، މިކަންކަން ހަމަޖެހުމަށް ފަހު އެއާޕޯޓާއި، ބަނދަރާ މެދު ގޮތެއް ނިންމުމެެވެ.
އެއާޕޯޓާއި، ބަނދަރުގެ މައްސަލަ އަދި މުޅިން ނިންމާފައެެއް ނުވެއެވެ. ދެން ހުރި ކަންކަން ކުރިއަށް ދާވަރަށް ބަލައި އެމައްސަލައާ މެދު ފަހުން ވާހަކަދައްކާގޮަތަށް އެެއްބަސްވެފައިވާ ކަމަށް އެނޫހުގައި ވެއެެވެ.
