މަސްވެރިކަމު ނުކުތް ޒުވާނަކު ރެއިން ފެށިގެން ގެއްލިގެން ހޯދަން ފަށައިފިއެވެ.
މަސްވެރިކަމު ދިޔަގޮތަށް ރޭ ދަންވަރު 1:20 ހާއިރު ޚަބަރެއް ނުވެގެން އާއިލާއިން ހޯދުމުގެ މަސައްކަތް ފެށި ޒުވާނަކީ ނ. ޅޮހީ، ފެހިވިނަ، ޙުސައިން އަދުނާނު (30 އަހަރު) އެވެ. ގެއްލިގެން ހޯދަމުން އަންނަ ޙުސައިންގެ ބޭބެ މުޙަންމަދު ފިރާޝް ދާދި ދެންމެއަކު އާފަތިސް ނޫހަށް މައުލޫމާތު ދިންގޮތުގައި ރޭ ދަންވަރު 1:20 ހާއިރު ކޮއްކޮއަށް ގުޅައި، ޚަބަރެއް ނުވުމުން ހޯދުމުގެ މަސައްކަތް ފެށީ ކަމަށެވެ.
ފިރާޝް ބުނީ ކޮއްކޮ މަހަށް ފުރީ އައުޓްބޯޑު އިންޖީނެއް އަޅާފައިވާ ކުޑަކުޑަ ބޮއްކުރައެއް ކަހަލަ އުޅަނދެއްގައި އޭނާ އެކަނި ކަމަށެވެ. ޙުސައިން މަހަށް ދާންވެގެން ފުރަން ގޮސް އުޅެނިކޮށް 11:15 ހާއިރު ބަނދަރު މަތިން ބަޔެއް މީހުންނަށް ފެނިފައިވާ ކަމަށް ފިރާޝް ބުންޏެވެ. ކަނޑު ގަދަވެ، ވައިވެސް ވަރަށް ބާރުވެ މޫސުން ގޯސްވެފައި ވަނިކޮށް ޙުސައިން މަހަށް ފުރުމުގެ ކުރިން އާއިލާގެ އެއްވެސް މީހަކަށް އޭނާ އެގަޑީ މަހަށް ފުރަން އުޅޭކަން އެނގިފައި ނެތް ކަމަށް ޙުސައިންގެ ބޭބެ ބުންޏެވެ.
މިވަގުތުވެސް ކޮއްކޮ ހޯދުމުގެ މަސައްކަތުގައި ކަނޑުމަތީގައި ހުރެ ވާހަކަ ދައްކަމުން ފިރާޝް ބުނީ ކޮއްކޮގެ ޚަބަރެއް އެންމެ ފަހުން އާއިލާއަށް ވެފައި ވަނީ ރޭ ދަންވަރު 1:15 ހާއިރު ކަމަށެވެ.
"ރޭ ދަންވަރު 1:15 ހާއިރު ކޮއްކޮ ގުޅި، ގުޅާފަ ބުނީ މިއުޅެނީ އިންޖީނު ހަލާކުވެގެންނޭ، ތިމަންނަ ބަލައި އައިސްދޭށޭ، ކޮއްކޮ ގުޅިއިރު އޮތީ ވަރަށް ބޮޑު ވިލާގަނޑެއް ނަގާފަ، ވަރަށް ވައިގަދަ، ކަނޑު ގަދަ، އެވިލާގަނޑާއެކު ވަރަށް ބޮޑު ވިއްސާރަގަނޑެއް އައި، ފޯނު ކެނޑުނީމަ ދެން ގުޅައިގުޅައި ޚަބަރެއްނުވި، ކޮއްކޮގެ ފޯނަކަށް އޭގެފަހަކުން ނުގުޅޭ، ފޯނު ނިވިފަ އޮތީ، އޭރުއްސުރެ ހޯދަމުން މިދަނީ، އެމްއެންޑީއެފްއަށްވެސް އޭރު ގުޅައިފިން" ފިރާޝް ބުންޏެވެ.
ފިރާޝް ބުނީ އޭނާގެ ކޮއްކޮއަކީ އާންމުކޮށް މަސްވެރިކަމު ގޮސް އުޅޭ ޒުވާނެއްވެސް ނޫން ކަމަށާއި އެހެންވެ ރޭ އެހާ ގަދައިރު ކުއްލިއަކަށް މަސްވެރިކަމު ފުރި ސަބަބެއްވެސް ނޭނގޭ ކަމަށެވެ. ޙުސައިންގެ އަންބަކު އަދި ދަރިޔަކުވެސް ނެތްއިރު އާއިލާ އާއި ރަށު މީހުން ދޯނިފަހަރުގައި ނުކުމެ ޙުސައިން ހޯދުމުގެ މަސައްކަތް މިހާރުވެސް ދަނީ ކުރަމުންނެވެ.
"މިހާރުވެސް ކަނޑުމަތީގައި މިއުޅެނީ، ވަރަށްގަދަ މިކޮޅަށް، ދުއްވާލެވޭވަރުވެސް ނުވޭ، ރޭ ކޮއްކޮ ގުޅިވަގުތު އެއައި ވަރުގަދަ ވިލާގަނޑާއެކު ހިޔެއްނުވޭ އެ ބޮއްކުރަލަށް އެރާޅުތަކުގެ ތެރޭގައި ހިފަހައްޓާލެވޭނެ ހެނެއްވެސް، އެހާވެސް ކަނޑު ގަދަ" ފިރާޝް ބުންޏެވެ.
