އަޟްހާ ޢީދު ބަންދާއި ދިމާކޮށް މީހުން ގޮވައިގެން ކަނޑު ދަތުރުކުރާ އުޅަނދު ފަހަރު ޗެކް ކުރުމުގެ އޮޕަރޭޝަނެއް އެމްއެންޑީއެފް ކޯސްޓްގާޑުން މިއަދު ފަށައިފިއެވެ.
ކޯސްޓްގާޑުން ބުނީ ކޮންމެ އަހަރެއްގެ ޢީދު ބަންދާ ދިމާކޮށް ކޯސްޓްގާޑުން ކުރިއަށްގެންދާ މި އޮޕަރޭޝަނަކީ ޢީދު ބަންދުގައި ކަނޑުމަގުން ގިނަ އަދަދެއްގެ ބަޔަކު ދަތުރުކުރާ ދުވަސްވަރަކަށް ވުމާއެކު، ދަތުރުކުރާ އުޅަނދާއި ޕަސިންޖަރުންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވޭތޯ ބެލުމުގެ ގޮތުން ކުރިއަށްގެންދާ އޮޕަރޭޝަނެއް ކަމަށެވެ.
އެގޮތުން މިއަދު ފެށި އޮޕަރޭޝަނުގައިވެސް އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ ބަލާނެއެވެ. އޭގެތެރޭގައި މެރިން ވީއެޗްއެފް ޗެކް ކުރުމާއި އުޅަނދު ފަހަރުގެ ކެޕްޓަން އަތުގައި ކަނޑުގެ އުޅަނދު ފަހަރު ދުއްވުމުގެ ލައިސަންސް އޮތްތޯ ބެލުމުގެ އިތުރުން ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ގިނަކަންތައްތައް ބެލުމަށްވެސް ވަނީ ހަމަޖެހިފައެވެ.
މާލޭ ބަނދަރު ސަރަހައްދުގައި އެމްއެންޑީއެފް ކޯސްޓްގާޑުގެ ސިފައިން މިއަދު ހަރަކާތްތެރިވާއިރު، މާލޭގެ ބަނދަރުން ފުރާ އުޅަނދުތަކާއި މާލޭގެ ބަނދަރަށް ވަންނަ އުޅަނދު ފަހަރުތައް ކޯސްޓްގާޑުން ހުއްޓުވައި، ޗެކްކުރަމުން ގެންދާނެއެވެ. އަދި، އެމްއެންޑީއެފްގެ އޭރިޔާތަކުން ޢީދުބަންދާ ދިމާކޮށް އަތޮޅުތަކުގެ ރަށްރަށުގައިވެސް މިއޮޕަރޭޝަން ކުރިއަށްގެންދާ ގޮތަށް ވަނީ ހަމަޖެހިފައެވެ.
އީދު ބަންދާ ދިމާކޮށް ރަށްރަށަށް ގިނަބަޔަކު ފުރަން ތައްޔާރު ވެފައިވާއިރު މިއަދު މިވަނީ މާލެ ސަރަހައްދަށް ވިއްސާރައިގެ އަސަރުވެސް ވަރަށް ބޮޑަށް ކޮށްފައެވެ.
