މަހަށް ގޮސް އުޅުމުގެ ތެރޭގައި ކަރަންޓުގައި ޖެހިގެން މީހަކު މަރުވެއްޖެއެވެ.
ކަރަންޓުގައި ޖެހި މަރުވީ ބަންގްލަދޭޝްގެ އުމުރުން 34 އަހަރުގެ ރައްޔިތެކެވެ. ރޭ ފަތިހު އޭނާ މަރުވެފައި ވަނީ ގއ. ގެމަނަފުށީ ދޯންޏެއްގައި މަސްވެރިކަމަށް ނުކުމެ އުޅުމުގެ ތެރޭގައި ކަރަންޓުގައި ޖެހުމުގެ ސަބަބުންނެވެ.
ގެމަނަފުށީ މީހަކު މައުލޫމާތު ދިންގޮތުގައި ބިދޭސީ މީހާ ދޯނީގައި ހުއްޓައި ކަރަންޓުގައި ޖެހެން މެދުވެރިވި ސަބަބަކީ އެންދަމަން ދޯނީގައި ދިއްލާފައިވާ ލައިޓް އޭނާގެ އަތުން ހިފަހައްޓައިގެން އެ ލައިޓުން އޭނާ ކަރަންޓުގައި ޖެހިގެންނެވެ. މިހާދިސާގައި އޭނާ ކަރަންޓު ޖެހުމުން ސަލާމަތް ކުރަން އޭނާގެ ގައިގައި އަތްލި ދިވެހި މީހަކަށްވެސް ކަރަންޓުގެ އަސަރު ކޮށްފައިވާ ކަމަށްވެއެވެ. ހިނގިއިރު އެ ދޯނި އޮތީވެސް އެރަށާ ވަރަށް ކައިރީގައި ކަމަށް ވެއެވެ.
ބިދޭސީ މީހާ ކަރަންޓުގައި ޖެހުމާއެކު އެ ދޯނި ވަނީ ގެމަނަފުއްޓަށް ގޮސް އޭނާ އެރަށު ސިއްޙީ މަރުކަޒަށް ގެންގޮސްފައެވެ. ފުލުހުން ބުނީ ކަރަންޓުގައި ޖެހި މަރުވި މީހާ ވީއެންމެ އަވަހަކަށް މާލެ ގެނައުމުގެ މަސައްކަތް ކުރަމުން އަންނަ ކަމަށެވެ. ނަމަވެސް އޭނާގެ ހަށިގަނޑު ބަންގްލަދޭޝްއަށް ފޮނުވާނެކަން ނުވަތަ ނޫންކަމެއް ފުލުހުން ނުބުނެއެވެ.
