ދިވެހިރާއްޖޭގެ ގައުމީޔުނިވަރސިޓީ އިން ބާއްވާ ތެވެލި ކޮންފަރެންސް މިއަދު ފަށައިފިއެވެ.
މިއީ ގައުމީޔުނިވަރސިޓީން މިކޮންފަރެންސް ބާއްވާ ދެވަނަ ފަހަރެވެ. ފުރަތަމަ ފަހަރު ބޭއްވީ މިދިޔަ އަހަރުއެވެ.
ގައުމީ ޔުނިވަރުސިޓީގެ ރިސާޗުސެންޓަރުގެ ޑީން ރަޙީމާ ޢަބްދުއްރަޙީމް އާފަތިހަށް މައުލޫމާތު ދެއްވަމުން ވިދާޅުވީ މިކޮންރެންސަށް ހުށަހަޅާ 105 ކަރުދާހުގެ ތެރެއިން 55 ކަރުދާހަކީ ރާއްޖެއިން ހުށަހަޅާ ކަރުދާސްތަކެއް ކަމަށެވެ. އޭގެ ތެރެއިން ގާތްގަޑަކަށް 48 ކަރުދާހެއް ހުށަހަޅުއްވަނީ ގައުމީ ޔުނިވަރސިޓީންނެވެ. ބާކީ 50 ކަރުދާހަކީ ބޭރުގެ ތަޖުރިބާކާރުން ހުށަހަޅުއްވާ ކަރުދާސްތަކެކެވެ.
ގައުމީ ޔުނިވަރސިޓީގައި މިއަދާއި މާދަމާ ކުރިއަށް ގެންދާ މިކޮންފަރެންސްގައި ތަފާތު ދާއިރާތަކުން ކަރުދާސް ހުށަހަޅުއްވުމަށްވަނީ ހަމަޖެހިފައެވެ. އޭގެތެރޭގައި ތެލެސީމިއާ، ހަނދު ސާބިތުކުރުން ފަދަ އެތައް ދިރާސާ ކަރުދާހެއް ހިމެނެއެވެ.
މިކޮންފަރެންސްގައި ސްރީލަންކާ، އިންޑިއާ، ޕާކިސްތާން، މެލޭޝިޔާ، އޮސްޓްރޭލިއާ، ނިއުޒީލޭންޑް، އޮމާން، ގަތަރު، ބަންގްލަދޭޝުން ބައިވެރިވެއެވެ. މިއީ އެމްއެންޔޫގެ މެންޑޭޓުގެ ތެރޭގައި ހިމެނޭ ޢިލްމު އުފެއްދުމާއި ފެތުރުމުގެ މަތިވެރި މަގުސަދުގައި ބާއްވާ އިލްމީ ކޮންފަރެންސެކެވެ.
މިއަދުގެ ދަންފަޅީގައި 200 އެހާ މީހުންވަނީ ބައިވެރިވެފައެވެ. މިކޮންފަރެންސް ފަށްޓަވައި ދެއްވީ މިނިސްޓަރ އޮފް ހެލްތު ޢަބްދުﷲ ނާޒިމް އިބްރާހީމެވެ.
