މިއަހަރުގެ ޙައްޖު ދުވަސް ނުވަތަ ޢަރަފާތު ދުވަހަކީ މިހިނގާ އޮގަސްޓް މަހުގެ 20 ވަނަ ދުވަސްކަމަށް މިނިސްޓްރީއޮފް އިސްލާމިކް އެފެއާޒުން ކަނޑައަޅުއްވައިފިއެވެ.
އެމިނިސްޓްރީ އެގޮތަށް ކަނޑައެޅުއްވީ މިއަހަރުގެ ޛުލްޙިއްޖާމަހުގެ ހަނދު ފެނިއްޖެ ކަމަށް ސަޢުދީ އަރަބިއްޔާއިން ކަނޑައެޅުއްވުމާ ގުޅިގެންނެވެ. ސަޢުދީން އެގޮތަށް ކަނޑައެޅުމުން މިއަހަރުގެ ޛުލްޙިއްޖާމަހުގެ ފުރަތަމަ ދުވަހަކީ އޮގަސްޓް މަހުގެ 12 ވަނަ ދުވަހަށްވަނީ ވެފައެވެ. "އެހެން ކަމުން 1439 ވަނަ އަހަރުގެ ޢަރަފާތު ދުވަހަކީ އޮގަސްޓްމަހުގެ ވިހި ވާ ހޯމަދުވަސް ކަމުގައި ހަމަޖައްސައިފީމެވެ." އިސްލާމިކް މިނިސްޓްރީން ކުރައްވައިފައިވާ އިޢުލާނެއްގައި ވިދާޅުވެފައިވެއެވެ.
މިގޮތަށް ހަމަޖެއްސެވުމުން މިއަހަރުގެ އަޟުޙާ ޢީދު ނުވަތަ ބޮޑު ޢީދު ދުވަހަށް ވެގެންދާނީ އޮގަސްޓް 21 ވާ އަންގާރަ ދުވަހެވެ. މިއަހަރުގެ ޢީދު ބަންދަށް އެއް ހަފްތާ ލިބޭނެ ކަމަށް ރައީސް އޮފީހުންވަނީ ކުރިން ވިދާޅުވެފައެވެ.
އިސްލާމިކް މިނިސްޓްރީގެ އިއުލާނުގައި ވިދާޅުވެފައިވަނީ މިދުވަސްތަކުގައި ހެޔޮއަމަލު ކުރުމުގެ ތައުފީގު ދެއްވައި ރާއްޖެ އަމާންތަނެއްގެ ގޮތުގައި ލެއްވުމަށް އެދިވަޑައިގަންނަވާ ކަމަށެވެ.
