އައްޑޫސިޓީގައި "ޖާޒީރާ" ގެ ނަމުގައި ވެހިކަލްބުރެއް މިއަދު ހަވީރު ބާއްވައިފިއެވެ.
މިއީ އިދިކޮޅު ސިޔާސީ ޕާޓީތަކުގެ ސަޕޯޓަރުން އިސްނަގައިގެން ބޭއްވި ވެހިކަލް ބުރެކެވެ. މިބުރުގައި ގިނައަދަދެއްގެ މީހުން ބައިވެރިވެފައިވެއެވެ.
ވެހިކަލްބުރު ފަށަފައިވަނީ ހިތަދޫގައި ހުންން އެމްޑީޕީ ޖަގަހަ ކުރިމަތިންނެވެ. މިބުރު ކުރިއަށް ދިޔައިރު ވަނީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) އަށް ތާއިދު ކޮށް ލިޔެފައިވާ ބޭނާތައް ބޭނުން ކޮށްފައެވެ. އަދި ބައެއް މީހުންވަނީ އިބޫއަށް ތާއިދުކޮށް ވާހަކަވެސް ދައްކައިފައެވެ. އެވާހަކައިގައި ރައީސް ޔާމީންގެ ވެރިކަން ބަދަލުކޮށްލުމަށް ސެޕްޓެމްބަރު މަހު 23 ގައި ބާއްވާ އިންތިޚާބުގެ ވޯޓުލުމުގެ ބޭނުން އެންމެ ފުރިހަމަ ގޮތުގައި ހިފުމަށް ވަނީ ގޮވައިލައިފައެވެ.
މިދުވަސްވަރަކީ ރިޔާސީ އިންތިޚާބުގެ ކެންޕޭން ވަރަށް ފޯރިއާއެކު ކުރިއަށްދާ ދުވަސްވަރެކެވެ. މިފަދަ އެއްވުންތަކާއި ވެހިކަލް ބުރުތައް އެހެން ރަށްރަށުގައި ވެސް ކުރިއަށް ގެންދިޔުމަށް އިދިކޮޅުން ވަނީ ރާވައިފައެވެ.
މިއަދުގެ އެއްވުމުގައި ރައީސް މައުމޫނަށް ތާއިދު ކުރާ މީހުންގެ އިތުރަށް ޖޭޕީ، އަދާލަތު އަދި އެމްޑީޕީއަށް ތާއިދުކުރާ މީހުންވެސް ވަނީ ބައިވެރިވެފައެވެ. މި ވެހިކަލް ބުރުގައި ގުޅިފައިވާ ރަށްތަކުން މީހުން ބައިވެރިވިއެވެ.
